• Perezida Paul Kagame yifatanyije na Perezida Mamadi Doumbouya gutaha umushinga Simandou Iron Ore Project

Perezida Paul Kagame yifatanyije na Perezida Mamadi Doumbouya wa Guinea ndetse na Perezida Brice Oligui Nguema wa Gabon mu muhango wo gutangiza umushinga wa Simandou Iron Ore Project, uzwi nk’ububiko bunini cyane ku isi bw’amabuye y’icyuma butari bwarakoreshejwe.

Uyu mushinga uteganyijwe kuzagira uruhare runini mu iterambere ry’ubukungu bwa Guinea no mu ishoramari rya Afurika yose, ukazagira n’inyungu ku masoko mpuzamahanga y’ubucukuzi.

Simandou Project urimo no kubaka gari ya moshi ifite uburebure bwa kilometero 600, izakoreshwa mu bikorwa by’ubucukuzi ndetse no mu yindi mirimo isanzwe y’ubwikorezi, hagamijwe guteza imbere ubuhahirane n’ubuhinzi n’ubukerarugendo mu bice bitandukanye by’igihugu.

Umushinga wo gutunganya aya mabuye y’agaciro uzaba wuzuye mu 2030, uruganda rwa Simandou ruzaba rufite ubushobozi  bwo gutunganya toni zigera kuri miliyoni 120 za ‘Fer’.

Kuri uyu  munsi wa  kabiri w’urugendo rwe biteganyijwe ko Perezida Kagame na Doumbouya bazafungura ku mugaragaro inama nyafurika ya TAS (Transform Africa Summit) iganirirwamo uko iterambere rya Afurika ryakwihutishwa.

Muri iyi nama itegurwa n’umuryango Smart Africa Alliance, Perezida Kagame n’abandi bazayitabira bazaganira ku ikoreshwa ry’ubwenge buhangano (AI) mu guhanga ibishya bizana impinduka muri Afurika no ku Isi muri rusange.

Abayobozi n’abahanze ibishya bazaganira ku ikoreshwa rya AI mu guteza imbere ubukungu bwa Afurika, gukomeza urwego rw’imiyoborere no kongera imbaraga mu guhanga ibishya.

Like This Post?

• Share On:

Related Posts

---