Yanditswe na: NSENGIYUMVA J Damascene
28/11/2025 19:05
Abasenateri bagaragaje ko kubona parikingi za moto n’amagare ari ikibazo gikomeye mu gihugu cyane ko ari ibinyabiziga bikomeje kugenda byiyongera umunsi ku wundi.
Byagarutsweho kuri
uyu wa 28 Ugushyingo 2025, ubwo Inteko Rusange ya Sena yagezwagaho raporo y’isesengura
ku ishyirwa mu bikorwa ry’ingamba zo gukumira impanuka yakozwe na Komisiyo
y’Ububanyi n’Amahanga, Ubutwererane n’Umutekano.
Senateri Mureshyankwano Marie Rose yagaragaje ko hari hakwiye
kubaho ingamba zo gukemura ikibazo kijyanye na parikingi za moto n’amagare kuko
hari ubwo zibangamira urujya n’uruza rw’ibinyabiziga.
Ati “Ese hari ingamba zihari zo kugena rwose parikingi za moto
ndetse n’iz’amagare kuko ahantu henshi usanga ziri mu muhanda, mu masangano,
zikabangamira urujya n’uruza mu mihanda.”
Perezida wa Komisiyo y’Ububanyi n’Amahanga, Ubutwererane
n’Umutekano, Murangwa Ndangiza Hadidja, yavuze ko ikibazo cya parikingi za moto
n’amagare gikomeye kandi giteye impungenge.
Ati “Mu by’ukuri ni ikibazo gikomeye, tuganira n’inzego
zitandukanye iki kibazo cyaragarukaga cy’abakeneye parikingi za moto n’amagare.
Mu mibare batweretse ko kuva dukoze iki gikorwa ubushize kugera ubu ngubu
hashize imyaka itanu, moto zikubye gatatu mu gihugu. Ni ukuvuga ngo parikingi
zazo nazo zikwiye kwikuba gatatu kandi ubwo butaka ntabwo buhari. Ni ikibazo
rero.”
Yavuze ko ubwo baganiraga n’Umujyi wa Kigali, wabagaragarije ko
na wo utewe impungenge n’icyo kibazo kandi ko uri kugishakira umuti.
Ati “Ndibuka tuganira n’Umujyi wa Kigali batweretse ko iki
kibazo nabo kibateye impungenge ko ahantu hari parking mu mujyi bagiye gushaka
uburyo bazajya basiga imyanya ya moto n’amagare kuko arakenewe, abaturage
barabikoresha cyane.”
Imibare y’Ikigo cy’Igihugu cy’Imisoro n’Amahoro, RRA, yerekana
ko mu 2020/2021 moto zanditswe zari 146.639, mu 2021/22 zigera kuri 148.675, mu
2022/23 zigera ku 165.155, mu 2023/24 zigera ku 184.509 mu gihe mu 2024/2025
zageze kuri 215.097.
Ku rundi ruhande abamotari bagaragaza ko parikingi ari ikibazo
mu Mujyi wa Kigali kuko usanga ari nke kandi abagenzi bakaba batarumva neza
impamvu basigara kure y’aho bagiye.
Hakorimana Etienne utwara abagenzi kuri moto, aheruka kubwira
IGIHE ko abona iyo umumotari aciwe amande kubera ko agejeje umugenzi aho yari
agiye hatari muri parikingi aba arenganyijwe.
Ati ‘‘Turibaza, moto ni umwanda ku buryo guhagarara ukuraho
umugenzi bakabaye bahita bakwandikira? […] Ukwandikiye ari kubona ko uri
gukuraho umugenzi wenda uhita ugenda. We akwandikiye ibihumbi 10 Frw, mu gihe
umugenzi aguhaye 1000 Frw. Urumva ko wowe urongeraho ibihumbi 9000 Frw kugira
ngo ubashe kwishyura ya mande baguciye. Mu gihe njye ntagejeje wa mugenzi aho
agiye, ni ikibazo ku mugenzi, kandi nanjye ubwanjye ni ikibazo kuri njye.
Umugenzi arababara cyane.’’
Iradukunda Janvier na we utwara abagenzi kuri moto, yasobanuye
ko hari abagenzi basiga ahari parikingi bakagira umujinya kubera ukuntu ari
kure, bagakubita abamotari ndetse bagatura ‘Casques’ za moto hasi nk’umujinya
batewe n’uko moto ibasize kure, hakaba ubwo abagenzi bishyura amafaranga make,
cyangwa bakanga kwishyura.
