1. Home
  2. Imikino
  3. FOOTBALL

Cristiano Ronaldo yahigitse abarimo Messi na Lewandowski abatwara igihembo cy'icyubahiro cya UEFA

Yanditswe na: DUSHIMIMANA Elias 2024-08-29 19:09:33 Imikino

Ku mugoroba wo kuri iyi wa Kane taliki ya 29 Kanama 2024, ubwo i Monaco mu gihugu cy'u Bufaransa haberaga ibirorori bya tombora ya UEFA Champions League ya 2024/25, Impuzamashyirahamwe y'Umupira w'Amaguru ku mugabane w'Iburayi, UEFA, yahise iha igihembo Cristiano Ronaldo nk'umukinnyi watsinze ibitego byinshi muri UEFA Champions kugeza ubu.

Iki gihembo Cristiano Ronaldo yagishyikirijwe na Aleksander Ceferin, Perezida wa UEFA biturutse ku bitego byinshi mu mateka ya UEFA Champions uyu rutahizamu  yatsinze  kugeza ubu aho afite ibitego 140 mu mikino 183 yakinnye.

Cristiano uza imbere mu batsinze ibitego byinshi mu Irushanwa rya UEFA Champions League, akurikiwe na Lionel Messi aho amurusha ibitego 11 ndetse na Roberto Lewandowski uza ku mwanya wa 3 we akaba amurusha ibitego 46.

Cristiano Ronaldo yashoboye kurangiza imyaka 8 ya UEFA Champions buri gihe aba umukinnyi watsinze ibitego byinshi muri buri mwaka, ibintu bitigeze bikorwa n'undi mukinnyi uwo ari we wese.


Muri Champions League ya 2013/14 yakoze amateka yo kuba umukinnyi utsinze ibitego byinshi muri Champions League imwe aho yatsinze ibitego 17 birimo n'icyo yatsinze mu minota y'inyongera ubwo bakinaga na Atletico Madrid ku mukino wa nyuma.


Ni we mukinnyi wenyine kandi washoboye gutsinda ku mikino ya nyuma itatu itandukanye aho yabikoze muri 2008, 2014 ndetse na 2017.

Cristiano Ronaldo kandi ni we wenyine washoboye gutsinda mu mikino myinshi ya UEFA Champions League yikurikiranya akaba yaramaze imikino 11 atsinda kuva mu kwezi kwa 6 kwa 2017 kugeza mu kwezi kwa 4 muri 2018 ndetse ni na we mukinnyi ufite Hat-tricks nyinshi muri iri rushanwa zigera ku 8 nkuko Ikinyamakuru Inyarwanda cyabyanditse.

Muri rusange Cristiano Ronaldo yegukanye ibikombe 5 bya UEFA Champions League birimo 4 yatwaye ari muri Manchester United ndetse na 4 yegukanye ari muri Real Madrid.




Related Post