Yanditswe na: NSENGIYUMVA J Damascene
17/10/2025 18:38
Ku nshuro ya mbere, Ubwongereza na Wales
byemeje gukoresha umuti mushya uterwa mu urushinge uzwi nka Cabotegravir
(CAB-LA), urinda umuntu kwandura virusi itera SIDA (HIV).
Uyu muti uterwa inshuro esheshatu mu mwaka, ni
ukuvuga rimwe mu mezi abiri, ukaba utanga amahirwe mashya kurusha ibinini bya
buri munsi bizwi nka PrEP bisanzwe bifasha mu kwirinda kwandura.
Inzobere mu buzima zivuga ko uyu muti ushobora kugira
uruhare rukomeye mu guhagarika ubwandu bushya bwa VIH bitarenze mu 2030, nk’uko
Ubwongereza bwiyemeje.
Minisitiri w’ubuzima w’Ubwongereza, Wes Streeting, yavuze
ko kwemeza uyu muti ari “intambwe ikomeye mu guhindura ubuzima bw’abantu, kandi
bigaragaza ubushake bwa guverinoma bwo kudasiga uwo ari we wese inyuma.”
Uyu muti wa Cabotegravir uje nyuma y’undi witwa
Lenacapavir, wemejwe na OMS muri Nyakanga 2025, nawo uterwa rimwe mu mezi
atandatu kandi ukarinda kwandura cyangwa kwanduza VIH.
Ibinini bya PrEP bisanzwe bikoreshwa mu kurinda kwandura,
ariko abantu benshi bagorwa no kubifata buri munsi cyangwa kubibona ahantu
hose. Hari n’ababifata bafite ipfunwe. Urushinge rwa CAB-LA rwo rufasha umuntu
kumara igihe kirekire adafata imiti buri munsi.
Mu Bwongereza, uyu muti uzatangwa ku bantu 1,000 bafite
ibyago byinshi byo kwandura VIH. Igiciro cyawo kiri hafi £7,000 ku mwaka (asaga
miliyoni 13 Frw), ariko Minisiteri y’ubuzima irimo kuganira n’uruganda ViiV
Healthcare ngo bagabanye iki giciro.
Kugeza ubu, nta rukingo rwa SIDA ruraboneka, ariko
abahanga baracyagerageza gushaka imiti n’inzira zishobora kurinda cyangwa
gukiza burundu VIH.
Ku isi hose, abagera kuri miliyoni 40 babana na virusi itera SIDA, muri bo 65% babarizwa muri Afurika, nk’uko OMS ibivuga.
Like This Post? Related Posts
