Urwego rw’Igihugu rw’Iterambere, RDB, rwatangaje ko amasezerano rwari rufitanye na Arsenal binyuze mu kwamamaza Visit Rwanda agiye gushyirwaho akadomo.

Kuva muri 2018 ni bwo Arsenal yagiranye amasezerano n’u Rwanda binyuze mu Rwego rw’Igihugu rw’Iterambere (RDB) aho yambaraga ‘Visit Rwanda’ ku kuboko kw’ibumoso ku ikipe nkuru, iy’abatarengeje imyaka 23 no mu ikipe y’abagore.

Kuri ubu aya masezerano yari amaze imyaka 8 agiye gushyirwaho akadomo aho azarangira muri Kanama muri 2026.

Ubu bufatanye bwagize uruhare rukomeye kuko nko mu mwaka ushize u Rwanda rwakiriye abashyitsi bagera kuri miliyoni 1.3, rwinjiza miliyoni 650 z’amadolari aho hiyongereyo 47% ugereranyije n’igihe ubufatanye bwatangiraga.

RDB ivuga ko ibyo bagezeho birenze kure intego bari bafite ubwo ubu bufatanye bwari bugitangira ndetse ko bwafashije mu kurushaho kumenyekanisha ubukerarugendo bugatuma abafana benshi bamenya u Rwanda.

Usibye ibi kandi ubu bufatanye bwanashyigikiye icyifuzo cy’u Rwanda cyo kuba ihuriro rya siporo muri Afurika no kwakira ibikorwa mpuzamahanga bya siporo ndetse bunashyigikira ibikorwa byo guteza imbere ruhago ku rwego rw’abakiri bato no kuzamura ubumenyi bw’abatoza.

Muri aya masezerano y’u Rwanda na Arsenal kandi hari abantu batandukanye baturutse muri iyi kipe baje gusura u Rwanda barimo Alex Scott, Mathieu Flamini, Bacary Sagna, Jurrien Timber, Caitlin Foord, Katie McCabe na Laia Codina. Baje gusura ibyiza nyaburanga no kwitabira umuhango wo Kwita Izina Abana b’Ingagi.

Umuyobozi Mukuru wa RDB, Jean-Guy Afrika, yashimye urugendo rw’iyi myaka umunani. Ati: “Twishimira ibyo twagezeho muri uru rugendo rwasize amateka mu kumenyekanisha u Rwanda ku isi. Twubatse ishusho nshya y’igihugu mu bukerarugendo kandi twishimira umusaruro wavuye muri ubu bufatanye. Ubu tugeze mu cyiciro gishya cyo kwagura isoko ryacu mu mikino itandukanye ku isi.”

Yongeyeho ko u Rwanda ruzakomeza gukorana n’abandi bafatanyabikorwa barimo NBA, Los Angeles Clippers yo muri NBA na LA rams ikina NFL.