• Minisitiri Nduhungirehe yakiriwe na Perezida wa Tchad Marchal Mahamat Déby Itno

Minisitiri w’Ububanyi n’Amaganga n’Ubutwererane, Olivier Nduhungirehe uri muri Chad nk’intumwa yihariye ya Perezida wa Repubulika Paul Kagame, yakiriwe na Marchal  Mahamat Déby Itno uyobora iki Gihugu.

Amb. Nduhungirehe yashyikirije Perezida Mahamat ubutumwa bwa Perezida Kagame, busaba Chad gushyigikira kandidatire ya Louise Mushikiwabo ku mwanya w’Umunyamabanga Mukuru w’Umuryango uhuza Ibihugu bikoresha Ururimi rw’Igifaransa (OIF). 

Ni igikorwa cyabaye kuri uyu wa Gatatu, tariki ya 8 Mata 2026.

Ku wa 12 Mutarama 2026, ni bwo Perezida Paul Kagame yafashe icyemezo cyo kongera gutanga Louise Mushikiwabo nk’umukandida ku mwanya w’Umunyamabanga Mukuru wa OIF.

Mushikiwabo ni Umunyamabanga Mukuru wa OIF kuva muri Mutarama 2019. Manda ye ya kabiri yatangiye mu kwezi k’Ugushyingo 2022, bivuze ko agiye guhatanira manda ya gatatu.

Natorwa, Mushikiwabo ashobora gukuraho agahigo ka Abdou Diouf wo muri Sénégal, wabaye Umunyamabanga Mukuru wa OIF kuva mu 2003 kugeza mu 2014 , aho yayoboye manda eshatu.

OIF yatangiye mu mwaka wa 1970 ifite abanyamuryango 90, kugeza ubu imibare igaragaza ko uyu muryango ukomeje gutera imbere aho abavuga Igifaransa bageze kuri miliyoni 396.

Umubano w’u Rwanda na Tchad umaze igihe kirekire uhagaze neza. Ubwo Perezida Mahamat yajyaga ku butegetsi asimbuye se, Maréchal Idriss Déby Itno, wishwe mu 2021, yagaragaje ubushake bwo gukomeza kuwongerera imbaraga.

Ibyo byashimangiwe no kohereza mu Rwanda intumwa ye yihariye ikaba n’Umuyobozi w’ibiro by’Umukuru w’Igihugu, Abdelkerim Déby Itno, wazaniye Perezida Kagame ubutumwa.

Muri Werurwe 2022, Perezida Mahamat na we yaje i Kigali, ashimira Perezida Kagame kuba u Rwanda rwarakomeje kuba hafi Tchad mu bihe bikomeye yanyuzemo ubwo yagabwagaho ibitero n’umutwe w’iterabwoba wa Boko Haram na nyuma y’urupfu rwa Idris Déby.

 

Like This Post?

• Share On:

Related Posts

---