Yanditswe na: NDAYISENGA Clement
24/04/2026 09:45
Guverinoma y’u Rwanda n’iya Repubulika Iharanira Demokarasi ya Congo (RDC) bongeye guhurira ku meza y’ibiganiro mu nama ya gatanu y’akanama gashinzwe gukurikirana ishyirwa mu bikorwa ry’amasezerano y’amahoro hagati y’ibihugu byombi.
Iyi nama yabereye mu murwa mukuru wa Leta Zunze Ubumwe za Amerika, Washington, D.C., ku wa 23 Mata 2026, ihuza impande zitandukanye zifite uruhare mu gushaka amahoro mu karere k’Ibiyaga Bigari.
Mu bayitabiriye harimo intumwa z’u Rwanda n’iza RDC, Leta Zunze Ubumwe za Amerika nk’umufatanyabikorwa mukuru, Qatar ifasha mu biganiro, Togo ihagarariye Umuryango wa Afurika Yunze Ubumwe nk’umuhuza, ndetse n’inzego z’uwo muryango zishinzwe ibikorwa bya buri munsi.
Ibyaganiriweho n’ibyagezweho
Nk’uko bigaragara mu itangazo rihuriweho n’impande zose, iyi nama yashimangiye akamaro ko gukomeza inzira y’amahoro no kugabanya umwuka mubi umaze igihe hagati y’u Rwanda na RDC.
Abayitabiriye baganiriye ku ntambwe imaze guterwa kuva mu nama ziheruka zabaye muri Werurwe 2026, aho buri ruhande rwatangaje ibyo rumaze kugeraho mu kugabanya ubushyamirane no kongera umutekano ku mipaka n’imbere mu bihugu.
Itangazo rigira riti:“Impande zombi zagaragaje ubushake bwo gukomeza gushyira mu bikorwa amasezerano no kugabanya umwuka mubi hagati yazo, hagamijwe kugera ku mahoro arambye.”
Uruhare rw’ibiganiro bya Doha
Igihugu cya Qatar cyatanze raporo ku mishyikirano iri kubera i Doha, ihuza Leta ya RDC n’umutwe wa AFC/M23. Abitabiriye inama bashimye intambwe iri guterwa muri ibyo biganiro, banashimira Busuwisi yakiriye ibyiciro byabanje.
Bemeje ko ibiganiro bya Doha bifite uruhare rukomeye mu gushyigikira no kunoza ishyirwa mu bikorwa ry’amasezerano y’i Washington.
Kwiyemeza gukomeza inzira y’amahoro
Impande zose zongeye gushimangira ko zigomba gukomeza uwo murongo w’ibiganiro, zishingiye ku byagezweho kugeza ubu, hagamijwe amahoro arambye mu burasirazuba bwa RDC no mu karere kose k’Ibiyaga Bigari.
U Rwanda na RDC byashimiye by’umwihariko abafatanyabikorwa barimo Amerika, Qatar, Umuryango wa Afurika Yunze Ubumwe na Togo ku ruhare rwabo mu guteza imbere amahoro n’umutekano.
Inzitizi zikigaragara
Nubwo hari intambwe imaze guterwa, haracyari imbogamizi zikomeye zituma ishyirwa mu bikorwa ry’amasezerano ritinda gutanga umusaruro wuzuye.
Ikibazo gikomeye kirimo ni icya FDLR, umutwe witwaje intwaro u Rwanda ruvuga ko ugizwe n’abagize uruhare muri Jenoside yakorewe Abatutsi mu 1994, ukaba ukorera mu burasirazuba bwa RDC.
U Rwanda rukomeje kugaragaza ko uyu mutwe uteje ikibazo gikomeye ku mutekano warwo, bityo rukavuga ko kudakuraho ingamba zarwo z’ubwirinzi bidashoboka mu gihe FDLR itarasenywa burundu, nubwo amasezerano asaba kugabanya ibikorwa bya gisirikare.
Amavu n’amavuko y’amasezerano
Aya masezerano y’amahoro hagati y’u Rwanda na RDC yasinywe ku wa 27 Kamena 2025 i Washington, D.C., agamije kurangiza amakimbirane amaze igihe mu burasirazuba bwa Congo no kugarura ituze mu karere.
Nyuma aza gushimangirwa n'abakuru b'ibihugu byombi imbere ya Perezida Donald Trump ku wa 04 Ukuboza 2025.
Icyizere cy’ejo hazaza
N’ubwo urugendo rukiri rurerure, impande zirebwa n’iki kibazo zigaragaza icyizere ko ibiganiro bikomeje bishobora gutanga umusaruro urambye, mu gihe hazakomeza kubaho ubushake bwa politiki no gushyigikirwa n’amahanga.
Like This Post? Related Posts
