Yanditswe na: NDAYISENGA Clement
24/06/2026 06:49
Ubushinjacyaha Bukuru bwa Kenya (DPP) bwatangaje ko abanyeshuri bakekwaho kugira uruhare mu nkongi y’umuriro yibasiye ishuri ryisumbuye rya Utumishi Girls School, igahitana abanyeshuri 16, bagiye gukurikiranwa n’ubutabera ku byaha 16 by’ubwicanyi.
Iyi nkongi yabaye ku wa 28 Gicurasi 2026 muri iri shuri riherereye i Gilgil, mu bilometero hafi 120 mu Majyaruguru ashyira u Burengerazuba bwa Nairobi, umurwa mukuru wa Kenya. Uretse abahasize ubuzima, abandi banyeshuri 79 barakomerekejwe n’iyi mpanuka, nubwo benshi muri bo bamaze gusezererwa mu bitaro.
Mu itangazo ryasohowe ku wa Kabiri, Ubushinjacyaha Bukuru bwavuze ko bwamaze gusuzuma raporo y’iperereza ry’ibanze yakozwe n’Urwego rw’Igihugu rushinzwe Ubugenzacyaha (DCI), maze bwemeza ko hari ibimenyetso bihagije byo gukurikirana abakekwa.
Iryo tangazo ryagize riti: “Abakekwa bazakurikiranwa ku byaha 16 by’ubwicanyi bifitanye isano n’ibi byago.”
Iyi nkongi iri mu mpanuka zikomeye zabaye mu mashuri ya Kenya mu myaka ya vuba aha, ikaba yarazamuye impungenge ku mutekano w’abanyeshuri n’imicungire y’ibikorwa by’umutekano mu bigo by’amashuri.
Ubushinjacyaha Bukuru bwanagaragaje ko ibikorwa byo gutwika inyubako n’ibindi byaha bikorerwa mu mashuri biri kwiyongera hirya no hino mu gihugu, bushimangira ko abazabihamwa bazahanwa hakurikijwe amategeko.
Bwanihanganishije imiryango yabuze ababo muri aya makuba, bunasezeranya ko buzatanga ubutabera buboneye kandi budaheza kugeza uru rubanza rusojwe.
Abakekwa muri iki kibazo biteganyijwe ko bazitaba ubutabera mu minsi iri imbere kugira batangire kuburanishwa ku byaha baregwa.
Like This Post? Related Posts
