Yanditswe na: NSANZABERA Jean Paul
02/09/2026 20:24
Perezida wa Repubulika Paul Kagame,yifatanyije n'abayobozi bagize Inama y’Ubutegetsi y’Urwego rw’Igihugu rw’Iterambere ya RDB mu nama yibanze ku isuzuma ry’ingamba z’u Rwanda mu bijyanye n’ishoramari n’iterambere ry’ubukungu.
Iyi nama yabaye kuri uyu munsi ikaba yari igamije gusuzuma mu buryo bwimbitse ibyihutirwa u Rwanda rwashyize imbere mu gukomeza guteza imbere ubukungu, gukurura ishoramari no guteza imbere urwego rw’abikorera.
Muri ibyo biganiro, hibanzwe ku ngamba zafasha u Rwanda gukomeza gukurura abashoramari bo mu gihugu no hanze yacyo guteza imbere ibikorwa by’ubucuruzi ndetse no gushyiraho uburyo burushijeho gutuma abashoramari babona amahirwe yo gushora imari mu Rwanda.
RDB ni urwego rukomeye mu bikorwa byo guteza imbere ubukungu bw’u Rwanda, cyane cyane mu gukurura no korohereza ishoramari, guteza imbere ubukerarugendo, guteza imbere ibyoherezwa mu mahanga no gufasha abikorera kubona amahirwe yo guteza imbere ibikorwa byabo.
Perezida Kagame amaze igihe ashimangira ko iterambere ry’u Rwanda rigomba gushingira ku bukungu bukomeye, kongera umusaruro, guteza imbere ishoramari no gushyiraho imirimo ku baturage.
Iyi nama kandi yitabiriwe Ivan Cyomoro Kagame uri mu bagize Inama y’Ubutegetsi ya RDB .
Iyi nama ije mu gihe u Rwanda rukomeje gushyira imbaraga mu gukurura ishoramari ry’abikorera, guteza imbere ibikorwa remezo no kongera uruhare rw’igihugu mu bukungu bw’akarere ndetse no ku rwego mpuzamahanga.
Isuzuma ryakozwe n’abayobozi ba RDB hamwe na Perezida Kagame rigamije gufasha igihugu gukomeza kugira umurongo usobanutse w’ibikorwa byihutirwa, hagamijwe kwihutisha iterambere ry’ubukungu no kubyaza umusaruro amahirwe ahari mu Rwanda.
Ubuyobozi bw’u Rwanda bukomeje gushyira imbere ubukungu bushingiye ku ishoramari, ikoranabuhanga, guhanga udushya no guteza imbere ubushobozi bw’abikorera, mu rwego rwo kongera umusaruro no guteza imbere imibereho y’abaturage.
