• U Rwanda n’u Bushinwa byiyemeje kurushaho gushimangira umubano n’ubufatanye

Umunyamabanga wa Leta muri Minisiteri y’Ububanyi n’Amahanga n’Ubutwererane, Dr. Usta Kaitesi, yifatanyije na Ambasade ya Repubulika y’Abaturage y’u Bushinwa i Kigali mu kwizihiza isabukuru y’imyaka 77 ishize Repubulika y’Abaturage y’u Bushinwa ishinzwe.

Uyu muhango  wabaye ku mugoroba wo kuri uyu wa kabiri tariki ya 22 Nzeri 2026 wanaye umwanya mwiza  wo kwizihiza imyaka 55 ishize u Rwanda n’u Bushinwa bifitanye umubano wa dipolomasi, umubano umaze imyaka myinshi ushingiye ku bucuti n’ubufatanye hagati y’ibihugu byombi.

Mu butumwa yagejeje ku bitabiriye uyu muhango, Dr. Usta Kaitesi yagarutse ku mubano w’ubucuti umaze igihe hagati y’u Rwanda n’u Bushinwa, ashimangira ko wagiye urushaho gukomera no kwaguka mu nzego zitandukanye.

Yavuze ko u Rwanda n’u Bushinwa bifitanye umubano ushingiye ku bwubahane, ubufatanye n’inyungu zihuriweho, ndetse ko mu myaka 55 ishize ibihugu byombi byagiye byongera imikoranire mu nzego zitandukanye.

Ubu bufatanye bugaragarira mu nzego zirimo ubucuruzi n’ishoramari, ibikorwa remezo, uburezi, ubuzima, ikoranabuhanga ndetse n’izindi gahunda zigamije guteza imbere imibereho y’abaturage no kuzamura ubukungu.

Dr. Kaitesi kandi yongeye gushimangira ko u Rwanda rwiteguye gukomeza gukorana n’u Bushinwa mu rwego rwo kurushaho guteza imbere umubano w’ibihugu byombi. Yagaragaje ko u Rwanda ruha agaciro ubufatanye rufitanye n’u Bushinwa kandi ko rwifuza ko bukomeza kwaguka mu gihe kiri imbere.

Ku ruhande rw’u Bushinwa, kwizihiza imyaka 77 Repubulika y’Abaturage y’u Bushinwa imaze ishinzwe byabaye umwanya wo kwishimira intambwe igihugu kimaze gutera ndetse no gusigasira umubano gifitanye n’ibihugu bitandukanye ku isi.

Kwizihiza imyaka 55 y’umubano wa dipolomasi hagati y’u Rwanda n’u Bushinwa na byo bifatwa nk’ikimenyetso cy’umubano umaze igihe kandi ukomeje gukura. Mu myaka ishize, ibihugu byombi byakomeje gushimangira ko ubufatanye ari ingenzi mu guteza imbere inyungu z’abaturage babyo.

U Rwanda rukomeje gushaka abafatanyabikorwa mu iterambere, mu gihe u Bushinwa na bwo bukomeje kugira uruhare mu mishinga itandukanye y’iterambere ku mugabane wa Afurika.

Uyu muhango wabereye i Kigali wasobanuye kandi ko imyaka 55 y’umubano wa dipolomasi ari umusingi wo gukomeza kubaka ubufatanye bushya, cyane cyane mu nzego zifite uruhare mu iterambere ryihuse ry’ibihugu byombi.

Mu butumwa bwe, Dr. Usta Kaitesi yongeye kwizeza ko u Rwanda ruzakomeza gukora ibishoboka byose kugira ngo umubano n’ubufatanye hagati y’u Rwanda n’u Bushinwa burusheho gukomera, hagamijwe guteza imbere inyungu z’ibihugu byombi n’abaturage babyo.

 

Like This Post?

• Share On:

Related Posts

---