• Niyitegeka Gratien yateguje igitabo azahuza na filime

Umukinnyi wa filime akaba n’umwanditsi Niyitegeka Gratien wamamaye nka Papa Sava, yatangaje ko ari gutegura igitabo kizaherekezwa na filime, bikazaba uburyo bwo kugaragaza byinshi bimuranga n’urugendo rwe mu buhanzi.

Papa Sava yavuze ko iki ari kimwe mu bikorwa ateganya gukora nyuma y’imyaka 30 amaze mu rugendo rw’ubuhanzi, aho yifuza guhuza ubwanditsi na sinema mu mushinga umwe.

Ibi yabigarutseho mu kiganiro yagiranye n’Itangazamakuru  nyuma yo kwitabira imurikwa ry’igitabo “Muraho! My Name Is Kagarara” cya Ashton Small, wamamaye nka Kagarara.

Papa Sava yavuze ko kuva agitangira gukora ubuhanzi yari afite igitekerezo cyo kwandika igitabo cye bwite, ariko uko imyaka yagiye ihita yaje kubona ko hari ubundi buryo bwiza bwo kubaka uwo mushinga.

Ati “Nkanjye natekerezaga gukora ikitwa ‘Who Am I?’, ariko ntibyaba ari byo bya mbere nshyira imbere, kuko naje gusanga kubikora muri sinema byandutira kubikora nk’inyandiko mu gitabo.”

Uyu mukinnyi wa filime yavuze ko kuba amaze imyaka 30 mu buhanzi bitamubereye impamvu yo guhagarika imishinga mishya, ahubwo ko akomeje gutekereza ku buryo yakomeza gusangiza abantu ibitekerezo n’ubunararibonye yagiye yunguka muri uru rugendo.

Muri gahunda afite harimo gukora igitabo kizaherekezwa na filime yacyo, ku buryo ibizaba biri mu gitabo bizagira n’uburyo bigaragarira muri filime.

Papa Sava yavuze ko uwo mushinga uzaba umeze nka ‘Docfiction’, ijambo rihuza uburyo bwa “documentaire” n’uburyo bw’inkuru y’ibihimbano, ku buryo igitabo na filime bishobora kuzuzanya mu gutanga ubutumwa bumwe.

Ati “Nanjye nzakora ibizwi nka ‘Docfiction’. Ni igitabo ariko kizahita kijyana na filime kuko nayo yararangiye, bikajyanirana kuko uba ushobora kubikora byose. Ni igitabo ushobora gukora, hanyuma ukagikoramo ikindi kintu.”

Yakomeje asobanura ko uyu mushinga ashaka kuwukora mu buryo bwihariye, ku buryo n’ubusizi bwe bushobora kugira uruhare mu kuwubaka.

Ati “Nk’uko ndi umusizi, nshobora gukoramo ikintu kimwe kuri buri gace, nyine kikaba gifite igice cyacyo cya filime.”

Abajijwe niba iki gitabo kizaba gikubiyemo ubuzima bwe bwite, Papa Sava yavuze ko intego yacyo atari ukwandika ubuzima bwe mu buryo busanzwe gusa, ahubwo ko ashaka ko kizagaragaza uwo ari we n’ibimuranga. Ati “Kigaragaza uwo ndi we, ‘Who Am I?’.”

Papa Sava ni umwe mu bantu bamaze igihe kinini mu ruganda rwa sinema Nyarwanda, aho amaze imyaka 30 akora ubuhanzi. Uretse gukina filime, azwi kandi nk’umwanditsi ndetse n’umusizi.

Uyu mushinga mushya wo guhuza igitabo na filime ni umwe mu buryo ashaka gukoresha mu gukomeza gusigasira no gusangiza abandi ibitekerezo, ubunararibonye ndetse n’ubutumwa yakusanyije mu rugendo rwe rw’ubuhanzi.

 

Like This Post?

• Share On:

Related Posts

---