• Sonko yanenze uburyo G20 ikoresha mu gukemura imyenda ya Senegal

Ousmane Sonko, uyobora Inteko Ishinga Amategeko ya Senegal akaba n’uwahoze ari Minisitiri w’Intebe, yanenze icyemezo cyo kwifashisha uburyo bwashyizweho n’ibihugu bikize n’ibikomeye mu bukungu bigize G20 mu kuvugurura imyenda ya Leta. Yagaragaje impungenge ku ngaruka zishobora guterwa n’iyo gahunda, anavuga ko itsinda ry’abadepite ashyigikiye rishobora kwanga gutora umushinga w’ingengo y’imari y’igihugu.

Mu murwa mukuru Dakar, Sonko akomeje kurwnaya icyemezo cya Guverinoma cyo kwitabaza uburyo bwa G20 mu gukemura ikibazo cy’umwenda munini wa Senegal. Iki gihugu kirateganya gukoresha uburyo bwavuguruwe kandi bukomejwe bwiswe Cadre commun, bwashyizweho mu 2020 kugira ngo buhuze ibiganiro bigamije kuvugurura imyenda y’ibihugu bifite ibibazo bikomeye by’ubukungu.

Icyakora, ubu buryo bwagiye bunengwa kubera ko ibiganiro hagati y’ibihugu biberewemo imyenda n’ababigurije bishobora gutinda, ndetse hakabaho kutumvikana ku ruhare buri ruhande rugomba kugira mu gukemura ikibazo.

Ousmane Sonko asanga Senegal idakeneye kwitabaza ubwo buryo kugira ngo ihindure gusa gahunda yo kwishyura imyenda yayo, hatabayeho kugabanya amafaranga igihugu kigomba kwishyura.

Yavuze ko ababerewemo imyenda bamaze kugaragaza ko batifuza ko umubare w’amafaranga bagomba kwishyurwa uhindurwa.

Sonko yagize ati: “Senegal ntiyari ikwiye kuba igihugu cya mbere gikoreshwa mu kugerageza ubwo buryo.”

Yagaragaje ko biteye impungenge kuba igihugu cye cyaba icya mbere kigeragerezwaho iyi gahunda ya G20, mu gihe, nk’uko abivuga, gisanzwe gifite ibibazo by’amikoro adahagije yo kwishyura inshingano zacyo za buri munsi.

Uyu munyapolitiki kandi yaburiye ko itsinda ry’abadepite bari ku ruhande rwe rishobora kwanga gutora umushinga w’ingengo y’imari ya Leta mu gihe Guverinoma yakomeza gushyigikira iyo nzira.

Yasobanuye ko atagamije kubangamira imikorere ya Leta, ariko avuga ko mu gihe umushinga w’ingengo y’imari utatorwa kubera iyo mpamvu, inshingano z’icyo kibazo zizaba ziri ku butegetsi.

Senegal ihanganye n’ibibazo bikomeye by’imari ya Leta, bishingiye ahanini ku mwenda munini igihugu gifite n’igitutu cyo kuwishyura.

Imibare igaragaza ko mu mpera za 2024, umwenda rusange wa Senegal wari ugeze kuri 132% by’umusaruro mbumbe w’igihugu (PIB). Byaje kugaragara ko hari igice cy’uwo mwenda kitari cyaragaragajwe uko bikwiye mu gihe cy’ubutegetsi bwa Macky Sall, wayoboye Senegal kuva mu 2012 kugeza mu 2024.

Ibi byatumye igihugu gihura n’imbogamizi mu micungire y’imari ya Leta, mu gihe kigomba gushaka uburyo bwo kwishyura imyenda gifite no gukomeza gutera inkunga ibikorwa by’iterambere n’imibereho myiza y’abaturage.

Ku wa 1 Nzeri 2026, Senegal yagiranye amasezerano n’Ikigega Mpuzamahanga cy’Imari (FMI) agamije gushyiraho gahunda y’inkunga ingana na miliyari 2.2 z’amadolari ya Amerika mu gihe cy’imyaka itatu.

Iyi gahunda igamije gufasha Senegal kunoza imicungire y’imari ya Leta no gushyiraho uburyo burambye bwo gukemura ibibazo by’imyenda. i

Kudahuza ibitekerezo hagati ya Ousmane Sonko n’ubutegetsi ku buryo bwo kuvugurura imyenda bishobora kugira ingaruka ku igenamigambi ry’ingengo y’imari y’igihugu, cyane cyane mu gihe Guverinoma ishaka kugarura icyizere cy’abafatanyabikorwa mpuzamahanga no gukomeza gutera inkunga ibikorwa bya Leta.

Ku ruhande rumwe, igihugu gikeneye uburyo bwo kugabanya igitutu giterwa no kwishyura imyenda. Ku rundi ruhande, hari impungenge z’uko uburyo buzakoreshwa bushobora gutuma ibiganiro n’ababerewemo imyenda birushaho kugorana cyangwa bikamara igihe kirekire.

Uko iki kibazo kizakemuka bizagira uruhare rukomeye mu kugena uko Senegal izacunga imari yayo, uko izishyura imyenda ndetse n’uburyo izakomeza gushyira mu bikorwa gahunda z’iterambere.

Impaka za Sonko zigaragaza ko ikibazo cy’umwenda wa Senegal kitarebana gusa n’amafaranga igihugu kibereyemo abandi, ahubwo kinarebana n’uburyo kizahitamo gukemura icyo kibazo kitabangamiye imikorere ya Leta n’imibereho y’abaturage.

 

Like This Post?

• Share On:

Related Posts

---