• Ubukungu / IBIKORWA-REMEZO
Kuri uyu wa Gatatu tariki 13 Ukuboza 2023, Nibwo Ubuyobozi bw’Umushinga ‘Green City Kigali’ buri bumurikire abaturage igishushanyo mbonera cy’uyu mushinga uzubakwa mu Murenge wa Kinyinya akarere ka Gasabo.

Ni igikorwa kitezweho ibitekerezo by'abaturage mbere y’uko gishyikirizwa Inama Njyanama y’Umujyi wa Kigali ikacyemeza burundu.

Iki gishushanyo mbonera gifite ubuso bungana na hegitari 600, cyateguwe kugira ngo gihuzwe n’intego zihariye z’umushinga zirimo iterambere n’imibereho ihendutse, guhangana n’imihindagurikire y’ibihe, gukoresha neza umutungo ndetse n’iterambere ry’umujyi rijyanye n’umuco.

Uyu mushinga wibanze cyane cyane ku ngaruka z’imihandagurikire y’ibihe mu mijyi yihuta mu iterambere, hanitabwa ku mabwiriza agenga ishyirwaho ry’umujyi urengera ibidukikije.

Iki gishushanyo mbonera cyakozwe hashingiwe ku gishushanyo mbonera gisanzwe cy’Umujyi wa Kigali cya 2050 ndetse kikaba kigaragaza impamvu yo gushyiraho “Green City Kigali” bikanakemura ibibazo by’ingenzi.

Ibiganiro nyunguranabitekerezo n’abaturage batuye hamwe n’abafite ubutaka mu Murenge wa Kinyinya biteganyijwe kuva tariki 12-22 Ukuboza 2023.

Umuyobozi w’Umujyi wa Kigali, Pudence Rubingisa yatangaje ko kugira ngo iki gishushanyo mboneza cyuzuze ibisabwa hakenewemo uruhare rwa buri muntu mu batuye mu Murenge wa Kinyinya.

Yagize ati “Umujyi wa Kigali wiyemeje gushyira imbaraga mu guteza imbere imiturire irambye. Uyu mushinga wa ‘Green City Kigali’ uhuza neza n’igishushanyo mbonera cy’Umujyi wa Kigali cya 2050 n’icyerekezo cy’u Rwanda 2050. Turashishikariza abatuye i Kinyinya kugira uruhare mu gutanga ibitekerezo ku gishushanyo mbonera cy’uyu mushinga. Ibitekerezo ndetse n’uruhare rwa buri wese ni byo bizatuma iki igishushanyo mbonera cyuzuza ibisabwa n’umujyi ndetse kinashyire mu bikorwa ibyifuzo by’abaturage."

Imiterere ya Green City Kigali

Imihanda igaragara mu gishushanyo mbonera cya “Green City Kigali” ijyanye n’imihanda ikubiye mu gishushanyo mbonera cy’umujyi wa Kigali.

Hazaba hari umuhanda uzenguruka hamwe n’uwagenewe imodoka nini zitwara abagenzi mu buryo bwa rusange kugira ngo ingendo zikorwe mu buryo bworoshye, ndetse n’urusobe rw’imihanda ruzaba rwubatse ahantu hahanamye, ahari ibiti ndetse n’inzira zagenewe abanyamaguru zitwikiriye nkuko IGIHE kibitangaza dukesha iyi nkuru.

Ikibaya kizaba gihuza inzira y’abanyamaguru ikikijwe n’ishyamba n’uwo muhanda wihuta wagenewe imodoka nini zitwara abagenzi mu buryo bwa rusange.

Hazaba kandi hari n’ibikorwaremezo byakoreshwa na buri wese mu buryo bworoshye. Hari kandi n’amashuri y’incuke, abanza, ayisumbiye, TVET, na kaminuza, ndetse n’ahantu hagenewe gukorerwa ibikorwa by’ubukungu mu rwego rwo guteza imbere imirimo idakomoka ku buhinzi.

Umuyobozi Mukuru wa Green City Kigali, Basil Karimba yatangaje ko inzego zitandukanye zizagira uruhare mu ishyirwa mu bikorwa ry’iki gishushanyo mbonera, bityo ngo kugitangaho ibitekerezo ni ingenzi cyane.

Ati “Green City Kigali igeze ku ntambwe ikomeye mu kugaragaza igishushanyo mbonera cyayo. Ubufatanye hagati y’inzengo za Leta, abafatanyabikorwa mu iterambere, inzego z’abikorera, n’abaturage buzagira uruhare runini mu gushyira mu bikorwa neza iki cyerekezo. Ndahamagarira buri wese gutanga ibitekerezo mu guhindura Kinyinya umujyi w’icyitegererezo mu mibereho irambye yo mu Rwanda n’ahandi."

Muri Green City Kigali hazubakwa inzu zihendutse zizagenerwa abaturage bari hagati ya 170,000 na 200,000.

Icyiciro cya mbere cy’ibanze kuri hegitari 16, giteganyijwe kujya ku bice 1.700 kugeza 2000 binyuze mu bufatanye bwa Leta n’abikorera. Uyu mushinga ni kimwe mu bintu by’ingenzi bigize ubufatanye buri hagati y’u Rwanda n’Ubudage, aho Guverinoma y’Ubudage binyuze muri KfW yatanze miliyoni 40 z’Amayero.

Like This Post? Related Posts
Andika igitekerezo
Recent Comments