Gakenke: Babangamiwe n'umuhanda wangiritse bigasubiza inyuma iterambere ryabo

Abaturage  bakoresha  umuhanda  unyura  aho  bita  Nyabitare  mu  Murenge  wa  Mugunga, mu Karere  ka   Gakenke,  baravuga  ko babangamiwe  cyane  no  kuba  uwo  muhanda  warangiritse   bigakoma mu nkokora ubuhahirane n'imigendanirane hagati yabo.

Abaganiriye na BTN TV bavuze ko bafashijwe uyu muhanda ugakorwa byatuma barushaho gukora akazi neza nta kibazo bafite kuko ubu imikorere isa n'iyasubiye inyuma yaba ku bantu bagenda n'amaguru cyangwa bawunyuramo hifashishijwe ibinyabiziga.

Umwe mu banyonzi yagize ati:”Nawe urabona uburyo hano hangiritse cyane, iyo uwinjiyemo bigusaba gusunika mpaka urenze ahantu habi kandi ni harerehare mu gihe cy'imvura noneho ugasanga ukererewe urugendo wari ufite niba hari umusaruro runaka wari ujyanye mu isoko ukawugezayo rigiye kuremura.

Umumotari yagize ati" Mu mvura urahagera ukifuza gusubira inyuma kuko ntiwahanyura neza kubera ko haba harengewe n'ibiziba ndetse ibyondo biba bigera hejuru hirya no hino mu muhanda. Ikindi no mumpeshyi izuba riva nabwo aba ari ibibazo cyane kuko niba uhageze ukahahirira n'ikindi kinyabiziga cyane cyane imodoka usanga buri wese ari gukatira imikuku ubwo impanuka ikavuka ubwo. Mu buryo bwo kwirinda impanuka rero, turasaba ko badufasha bakawukora kuko ni bwo twakora neza kandi dutekanye”

Umusaza waganiriye n'umunyamakuru wa BTN, yavuze ko nk'abafite intege nke bagorwa cyane no kuhanyura. Ati" Ubu se nkatwe tugeze mu zabukuru twakoroherwa no kunyura muri uyu muhanda washegeshwe n'ibinogo ndetse n'ibiziba?, keretse baduhetse. Uramutse uri umurwayi ujyanwe kwa muganga ukahanyuzwa wagezwayo wamaze gushiramo umwuka bitewe no kugucugusiriza mu modoka cyangwa ikindi kinyabiziga igihe kiri gusunikwa cyangwa gikatira ibinogo, wabakerereza cyangwa bikabasaba gusubira inyuma".

Uyu muhanda wangiritse ntuhangayikishije abaturage gusa kuko n'Ubuyobozi bw'Umurenge  wa  Mugunga busanga ari ikibazo gikomeye kuko nabwo buremeza  ko gishegesha iterambere ry'abawukoresha gusa nanone bugasobanura ko uyu  muhanda  wangiritse biturutse ku mugezi  wa  Mukungwa   unyura  ku nkengero zawo ukunda kuzura  ugasatira  uyu  muhanda bikawuviramo kwangirika nkuko bisobanurwa n'Umunyambanga Nshingwabikorwa, Eugene Uwimana unatangaza ko iki kibazo cyagejejwe mu nzego zisumbuye.

Agira ati" Nibyo koko ikibazo cy'uwo muhanda wangiritse turakizi, si abaturage gusa gihangayikishije kuko natwe abayobozi kitugiraho ingaruka muri rusange uwo ariwe wese uwunyuramo arahangayitse cyane. Ubundi inkomoko y'icyo kibazo ni umugezi wa Mukungwa ukunda kuzura ubundi ukaboneza muri uwo muhanda ugahita wangirika, gusa icyo nakwizeza abaturage nuko kiri gushakirwa igisubizo kuko twamaze kugishyikiriza inzego zisumbuye".

Bitewe  nuko uko  iminsi igenda ihita  ari  nako  uyu muhanda  ugenda  wangirika  kurushaho, aba baturage  barasabako  batabarwa  vuba ugakorwa kugira ngo udacika burundu ndetse  ugakomeza  kubashyira  mu bwigunge  kurushaho.Umuhanda warangiritse bikoma mu nkokora ubuhahirane n'imigendanirane by'abawukoresha

Gaston NIREMBERE/ BTN TV i Gakenke