Yanditswe na: NSENGIYUMVA J Damascene
28/11/2025 10:29
Ba Perezida Paul Kagame na mugenzi we Félix Antoine Tshisekedi wa Repubulika Iharanira Demokarasi ya Congo, byitezwe ko bazahura na Donald Trump wa Leta Zunze Ubumwe za Amerika ku wa 4 Ukuboza 2025, mu nama izasiga bashyize umukono ku masezerano y’amahoro.
Amakuru kuri ubu avuga ko Washington ikomeje
kotsa igitutu Kigali na Kinshasa, mu rwego rwo gushyira iherezo ku mwuka mubi
umaze igihe hagati y’ibihugu byombi, ndetse n’intambara Kinshasa imaze imyaka ine
iri hagati ya Kinshasa na AFC/M23.
Perezida Paul Kagame mu kiganiro
yahaye abanyamakuru ku wa Kane tariki ya 27 Ugushyingo, yemeje ko guhurira i
Washington na Tshisekedi bishoboka ndetse bikaba ari intambwe nziza, nyuma
y’uko bagombaga guhura mu kwezi gushize k’Ukwakira no muri uku k’Ugushyingo
ntibikunde.
Yagize ati: “Icy’uko guhurira i
Washington byashoboka, tukaganira, tukemeranya cyangwa tukagira ibyo dusinya ni
intambwe nziza. Ni intambwe nziza. Mu myaka yose yabanje, ntihabayeho ikintu
nk’icyo. Twabonye abantu basura u Rwanda na Congo, bakihutira muri Loni, mu
kanama gashinzwe umutekano, bagatanga amatangazo, bagatora imyanzuro.”
Yakomeje ati: “Ni yo mpamvu mu myaka
ya mbere, twatakaje igihe kinini nta kintu gifatika tugeraho. Gahunda zombi,
imwe ya Washington n’indi ya Doha ariko navuga ku ya Washington; iyi ni
intambwe nziza iri mu cyerekezo cyiza, twaba tugeze mu bihe by’ingenzi biduha
ibishoboka bigaragara n’icyizere cy’uko turi hafi yo kubona amahoro arambye, ni
ikintu twakomeza kwizera no guharanira.”
Perezida Kagame yavuze ko ubutegetsi
bwa Donald Trump bwakoze neza kubera ko izindi gahunda z’amahoro zabanje
zitigeze zitanga umusaruro nk’uwo ibiganiro by’amahoro bya Washington biri
kugeraho.
Kagame icyakora yavuze ko n’ubwo Amerika iri gutanga umusanzu ukomeye mu gushakira u Rwanda na Congo amahoro, hagikenewe ubushake bw’ibihugu byombi n’ibindi bihugu byo mu karere, kuko kubura kwabwo mu biganiro bya Nairobi na Luanda ari byo byatumye bidatanga umusaruro.
