Abahanzi bagezweho mu muziki nyarwanda, Kenny Sol na Chriss Eazy, bahuriye bwa mbere ku rubyiniro rw’igitaramo cya Gen-Z Comedy, basusurutsa abantu mu buryo budasanzwe ndetse banashyigikira ubutumwa bwo kwirinda indwara zandurira mu mibonano mpuzabitsina no gushishikariza abantu kwipimisha hakiri kare.

Iki gitaramo cyabaye mu ijoro ryo ku wa Kane, tariki 27 Ugushyingo 2025, muri Kigali Conference and Exhibition Village (Camp Kigali), cyabereye ibihe bidasanzwe abatuye Umujyi n’abari bafite inyota yo kurangiza ukwezi k’Ugushyingo mu buryo bw’udushya tw’urwenya n’umuziki.

Dr. Hillary Okello ukomoka muri Uganda, yongeye kwereka abakunzi b’urwenya impano ye imaze kumugira umwe mu banyabigwi muri Gen-Z Comedy. Yafatanyije n’abanyarwenya bo mu Rwanda barimo Muhinde, Umushumba, Pilate, Salisa, Mitsi, Captain Regis na Manasse, bose bagaragaza ko urwenya rwa Kigali rukomeje gutera imbere mu miterere, imvugo n’ubukure bw’imikorere.

Mu gace ka “Meet me Tonight”, hatumiwemo Karegeya, washinze ikigo gikorera ubukerarugendo “Ibere rya Bigogwe”. Yagarutse ku rugendo rwe rwo kwiyemeza kwikorera, uburyo ibikorwa bye byagutse ndetse n’abantu batandukanye amaze kwakira baje gutembera no kwigira ku byo yubatse.

Nyuma y’ibi byiciro by’urwenya, urubyiniro rwasuwe n’abahanzi babiri bakunze kwigarurira urubyiruko. Chriss Eazy ni we watangije igice cy’umuziki, aririmba zimwe mu ndirimbo ze zisimbye izina rye zirimo ‘Bana’ yakoranye na Shaffy, ari nako yongera guhuza n’abafana be bari bamukeneye.

Yahise asimburwa na Kenny Sol, wamukoreye mu ngata mu buryo bw’umwuga binyuze mu ndirimbo ze zirimo “Haso”, n’izindi ndirimbo zakunzwe cyane mu myaka ishize yakoranye n’abahanzi batandukanye.

Ni ubwa mbere aba bahanzi bombi bari bahuriye kuri uru rubyiniro rwa Gen-Z Comedy, kandi bombi bashimiye abafana uburyo babakiriye, bavuga ko kuba baratumiwe muri iki gitaramo kiba kabiri mu kwezi ari icyubahiro gikomeye.

Iyi nshuro, Gen-Z Comedy yabaye igaragiwe n’ubutumwa bwihariye. Abategura iki gitaramo bifatanyije n’inzego z’ubuzima bashishikariza abantu kumenya uko bahagaze binyuze mu kwipimisha indwara zinyuranye cyane cyane SIDA.

Hanibukijwe cyane cyane urubyiruko gukoresha agakingirizo nk’imwe mu ngamba zo kwirinda indwara zandurira mu mibonano mpuzabitsina.

Dr. Hillary Okello waturutse muri Uganda, by’umwihariko yongeye kwereka Abanya-kigali urwego rw’umurimo we nyuma yo gutaramira muri "Comedy Store" ku wa 26 Ugushyingo 2025, aho yari yahuye n’abahanzi nka Ross Kana, Sheebah Karungi na Vinka, bityo akomeza kwiyubakira izina mu bitaramo bibera mu karere.

Gen-Z Comedy ikomeje kuba imwe mu mpinduramatwara mu ruganda rw’urwenya mu Rwanda, ikaba ikura umunsi ku wundi mu kwerekana impano nshya, gutekereza ingingo zishyushye no guhuza umuziki n’urwenya mu buryo butuma abantu bagenda basetse.