Yanditswe na: NSENGIYUMVA J Damascene
30/11/2025 23:43
Minisitiri w’Ububanyi n’Amahanga n’ubufatanye n’akarere w’u Burundi, Edouard Bizimana, yaciye amarenga ko igihugu cye gishobora kugirana ibiganiro hagati n’u Rwanda bigamije gukemura ibibazo bihari, nubwo bitari kwihuta ku rugero rushimishije.
Yabivuzeho mu
Kiganiro n’abanyamakuru giheruka kuba ku wa Gatanu tariki ya 28 Ugushyingo
2025.
Minisitiri Bizimana yavuze ko Abanyarwanda n’Abarundi ari
abavandimwe bityo ko nta gikwiye gutuma imiryango ibahuza ihora ifunzwe.
Ati “Abarundi n’Abanyarwanda turabana burya turi ababyara.
Dusangiye imipaka dusangiye n’umuco sinibaza ko hari ikibazo kinini cyane
cyatuma imiryango yose ifungwa. Ibibazo birahari ariko byose bizabonerwa
ibisubizo biciye mu biganiro kandi kuvugana birakomeje.”
Yakomeje agaragaza ko inzira y’ibiganiro ari yo izakemura
ibibazo biri hagati y’ibihugu byombi kandi ko bikomeje nubwo bitari ku muvuduko
ushimishije.
Ati “Nubwo guhura byaba bitakiri byinshi cyane ariko birakomeje.
Murabizi ko n’ibihugu biri kurasana inzira y’ibiganiro ihora ifunguye. Aha rero
ibiganiro birakomeje nubwo umuvuduko waba udashimishije nababwiye ko imiryango
yose idafunzwe, turakomeza kuganira kuko dufite byinshi biduhuza. Turi mu
karere kamwe dusangiye ahashize, burya tunasangiye ahazaza ngira ngo turumva ko
impande zombi dutegetswe gushyiramo imbaraga.”
Uyu muyobozi yavuze ko u Burundi bwashyize imbaraga mu kugira
ngo imigenderanire hagati y’impande zombie igende neza ariko hari ibitarakozwe.
U Burundi bwafunze imipaka yabwo n’u Rwanda muri Mutarama 2024,
burushinja gufasha umutwe witwaje intwaro wa RED Tabara.
Iki kirego rwagiteye utwatsi, rugaragaza ko ari uburyo bwo
kwihunza inshingano zo gukemura amakimbirane ari imbere mu gihugu.
Kuva icyo gihe hagiye habaho ibiganiro byo kubyutsa umubano,
ariko bikarangira nta musaruro bitanze.
Icyemezo cy’u Burundi cyo gufunga imipaka cyaje nyuma y’amarenga
Perezida Ndayishimiye yari yaciye mu ijambo risoza umwaka wa 2023, ko ashobora
gufunga imipaka ihuza igihugu cye n’u Rwanda nyuma yo kurushinja gufasha umutwe
wa RED Tabara urwanya ubutegetsi bwe.
Ni ibirego u Rwanda rwateye utwatsi, rugaragaza ko nta shingiro
bifite, dore ko n’ibice RED Tabara yanyuzemo itera u Burundi, ntaho bihuriye
n’u Rwanda.
Nyuma yo gufunga umupaka Ndayishimiye yagiye agaragara mu mvugo
zitandukanye zishinja u Rwanda ko rushaka gutera igihugu cyabo, nyamara
rukabihakana rugaragaza ko nta shingiro bifite.
Perezida Paul Kagame aganira n’abanyamakuru ku wa 27 Ugushyingo
2025, yabajijwe aho umubano w’ibihugu byombi uhagaze uyu munsi, nyuma y’uko
hashize iminsi mike hari impunzi z’Abarundi zari mu Rwanda zitashye, ndetse
abasirikare b’Abarundi bakitabira inama iherutse guhuriza i Kigali abagaba
b’ingabo zirwanira ku butaka.
Ati “Imipaka yo iracyameze nk’uko yari imeze ariko twebwe na mbere ya hose no gufungwa kw’iyo mipaka nta ruhare u Rwanda rubifitemo na ruto, Abarundi ni bo bahisemo gufunga imipaka turababwira ngo aho bazashakira gufungura twebwe ntabwo twigeze dufunga.”
Like This Post? Related Posts
