Yanditswe na: NDAYISENGA Clement
17/01/2026 18:38
Komisiyo y'amatora muri Uganda yatangaje ko Perezida Yoweri Museveni yatsinze amatora ya perezida n'amajwi 71.6% mu gihe uwo bari bahatanye cyane Bobi Wine (Robert Ssentamu) yagize amajwi 24.7% naho abandi bakandida batandatu uwaje hafi ni Nathan James Nandala wagize 1.88% na Mugisha Muntu wagize 0.53%.
Ibi byatangajwe kuri uyu wa Gatandatu, tariki ya 17 Mutarama 2026 na Perezida wa komisiyo y'amatora ya Uganda, Simon Mugenyi Byabakama.
Ibyavuye mu matora yabaye ku wa kane, tariki ya 15 Mutarama 2026, byatangajwe nyuma y'amasaha make Bobi Wine atangaje amashusho avugamo ko "ibigiye gutangazwa na Byabakama [perezida wa komisiyo y'amatora] ari 'fake' [atari byo]".
Ibyavuye mu matora byatangajwe nyuma y'iminsi itanu (5) internet ikuweho muri Uganda. Ibintu byamaganiwe kure n'abatari bake by'umwihariko abatavuga rumwe n'ubutegetsi.
Leta ya Uganda ivuga ko yafashe iki cyemezo mu rwego rwo kubungabunga umutekano w'igihugu muri iki gihe cy'amatora no kwirinda amakuru atari yo (ibihuha).
Bobi Wine n'abo mu ishyaka rye NUP bavuga ko gufunga internet "bigamije gukora uburiganya mu matora, isi itareba ibirimo kuba".
Kubera kubura internet mu gihugu byagoye ibinyamakuru byigenga kugenzura ibyabaye mu matora no kugenzura ibyayavuyemo.
Komisiyo y'amatora yavuze ko abatoye bose hamwe ari abantu miliyoni 11.3 bangana na 52% by'abari biyandikishije gutora. Iyo komisiyo ivuga ko amajwi agera ku bihumbi 275 yabaye impfabusa, ayo akangana na 2.4%.
Ibiro ntaramakuru AFP bisubiramo umwe mu ndorerezi z'amatora, Goodluck Jonathan wahoze ari perezida wa Nigeria, avuga ko yabayemo ibikorwa "byo gutera ubwoba, guta muri yombi no gushimuta" byibasiye abatavuga rumwe n'ubutegetsi n'abo muri sosiyete sivile.
Mu butumwa bwa video yacishije kuri Facebook ye, Bobi Wine yahamagariye abanya-Uganda "guhaguruka bakamagana ibiva mu matora" we avuga ko "komisiyo y'amatora yibiye Museveni".
Bobi Wine avuga ko ari ahantu hatazwi nyuma yo gucika inzego z'umutekano zari zamufungiye iwe mu rugo n'umuryango we aho atuye i Magere hanze gato y'umurwa mukuru Kampala.
Igipolisi cya Uganda uyu munsi cyatangaje ko ibivugwa na Bobi Wine n'abamushyigikiye ko ubuzima bwe buri mu kaga ari ibinyoma.
Igipolisi kandi cyasabye abantu kugumana ituze no kwirinda ibikorwa ibyo ari byo byose by'imigumuko nyuma y'amatora y'umukuru w'igihugu.
Ni amatora atitabiriwe cyane nk'uko bikwiye kuko abari kuri lisiti y'itora basagaga miliyoni 21 mu gihe abatoye ari miliyoni 11.3.
Ibyatangajwe bisobanuye ko Yoweri Museveni w'imyaka 81 y'amavuko atorewe manda ya karindwi yikurikiranya nka perezida wa Uganda izatuma aguma ku butegetsi kugeza mu 2031.
Ibi kandi birakomeza kugira Museveni Perezida iyoboye Uganda igihe kinini kuko ari ku butegetsi kuva mu mwaka 1986, bivuze ko azasoza iyi Manda amaze imyaka 45 ku butegetsi.
Perezida Museveni ni na Perezida wa gatatu muri Afurika umaze imyaka myinshi ku butegetsi nyuma ya Paul Mbiya wa Cameroon uri ku butegetsi kuva mu 1982 na Teodoro Obiang Nguema Mbasogo wa Guinée Équatoriale wagiye ku butegetsi mu 1979.
Like This Post? Related Posts
