Yanditswe na: NDAYISENGA Clement
20/03/2026 11:19
Perezida wa Repubulika Iharanira Demokarasi ya Congo, Félix Tshisekedi, kuri uyu wa Kane, yagejeje ku bahagarariye ibihugu bikoresha Igifaransa bakorera i Kinshasa kandidatire ya Juliana Amato Lumumba. Iyi nama yabereye mu Cité de l’Union africaine.
Muri
uwo muhango, Perezida yasabye abo bahagarariye ibihugu gushyigikira byimazeyo
uyu mukandida mu bihugu byabo, mu rwego rwo kwitegura amatora y’umunyamabanga
mukuru w’Umuryango w’Ibihugu bikoresha Ururimi rw’ Igifaransa (OIF).
Umukandida ufite ubunararibonye
Mu
ijambo rye, Félix Tshisekedi yagaragaje ko Juliana Amato Lumumba ari umukandida
ufite uburambe, agaragaza ko yagiye akora imirimo itandukanye mu nzego za Leta
ya Congo, harimo kuba yarabaye visi-minisitiri ndetse na minisitiri w’umuco.
Yavuze
ko kandidatire ye ihagarariye icyerekezo gishya cy’Umuryango w’Ibihugu
bikoresha Ururimi rw’Igifaransa, kirenze urwego rw’ururimi gusa.
Ati:“Gushyigikira
kandidatire ye si ugushyigikira gusa umugore ufite ubunararibonye, ahubwo ni
ugushyigikira Igifaransa gifite intego za politiki n’ubumuntu.”
Kujya ku Francophonie bifite
uruhare rukomeye
Iki
gikorwa kigamije gutuma OIF irushaho kugira uruhare mu bibazo by’isi ya none,
cyane cyane mu bijyanye n’ubusugire bw’ibihugu, amahoro n’iterambere.
Perezida
wa RDC yanagaragaje ko ari ngombwa ko OIF yibanda ku rubyiruko, uburezi
n’ikoranabuhanga rigezweho.
Inyungu za dipolomasi ku RDC
Ku
ruhande rwa Repubulika Iharanira Demokarasi ya Kongo, iyi kandidatire ifite
akamaro kanini. Icya mbere ni ugukomeza kongera ijwi ry’Afurika muri OIF,
umuryango ufite imbaraga mu bya politiki mpuzamahanga.
Icya
kabiri ni ukugaragaza ubushake bw’iki gihugu bwo kwiyerekana nk’umukinnyi w’imena
mu muryango w’ibihugu bikoresha Igifaransa.
Guverinoma
ya RDC muri Gashyantare ni bwo yatangaje kandidatire ya Juliana Amato Lumumba,
umukobwa wa Patrice Lumumba, umwe mu ntwari zaranze urugamba rw’ubwigenge bwa
RDC, ko azahatanira uwo mwanya mu matora ateganyijwe mu Ugushyingo 2026.
