• Mali: Leta yemeye kurekura ibyihebe mu rwego rwo kubona lisansi I Bamako

Muri Mali, ubuyobozi bwafashe icyemezo cyo kurekura abakekwaho kuba abarwanyi b’aba-djihadiste bagera ku ijana, bo mu itsinda ryitwa Groupe de soutien à l’islam et aux musulmans (GSIM). Mu rwego rwo kubisimbuza, iri tsinda rifitanye isano na Al-Qaïda, rizwi ku mpine ya JNIM, ryiyemeje gufungura inzira yorohereza imodoka zitwara lisansi kunyuramo.

Kuva muri Nzeri 2025, uyu mutwe w’aba-djihadiste wari warahagaritse itwarwa rya lisansi ijyanwa i Bamako, utera ibitero ku makamyo ayitwara. Ibi byateje ikibazo gikomeye mu murwa mukuru wa Mali.

Amasezerano hagati y’ubuyobozi bwa Bamako n’aba-djihadiste azakomeza kubahirizwa kugeza ku munsi mukuru w’Abayisilamu wa Tabaski uzaba muri Gicurasi, nk’uko byatangajwe n’amasoko y’umutekano yabibwiye Ibiro Ntaramakuru by’Abafaransa (AFP).

Uretse abakekwaho kuba mu mutwe wa JNIM, hanarekuwe n’urubyiruko rw’Abapeul, akenshi bafatwa nk’abafatanyabikorwa b’aba-djihadiste muri Mali.

Iki gihugu cyo muri Afurika y’Iburengerazuba kimaze igihe gihanganye n’ibibazo bikomeye by’umutekano kuva mu mwaka wa 2012. Ibi bibazo bikomeje guterwa n’imitwe ifitanye isano na Al-Qaïda n’uwo bita Leta ya Kiyisilamu (Islamic State), hamwe n’udutsiko tw’abagizi ba nabi two mu gihugu imbere.

 

 

 

 

Like This Post?

• Share On:

Related Posts

---