• Perezida wa Ferwafa Shema Fabrice yashimangiye ko FIFA Series ari igihe cyiza cyo gutegura Amavubi

Perezida w’Ishyirahamwe ry’Umupira w’Amaguru mu Rwanda (FERWAFA), Shema Ngoga Fabrice, yagaragaje ko imikino ya FIFA Series ari umwanya mwiza wo kwisuzuma ku Ikipe y’Igihugu ‘Amavubi’ ubwo izaba ihangana n’amakipe akomeye.

Uyu muyobozi yabigarutseho mu kiganiro n’itangazamakuru cyabaye mbere y’iri rushanwa rizatangira kubera i Kigali kuva tariki ya 26 kugeza kuya 30 Werurwe 2026.

Ubwo yari abajijwe intego Amavubi azajyana muri iyi mikino, Perezida Shema yagaragaje ko ari umwanya mwiza wo guhatana n’amakipe akomeye.

Yagize ati “Dufite abakinnyi n’abatoza bashya. Ejo narabasuye ndumva Amavubi azatsinda gusa ntabwo azaba ari imikino yoroshye kuko turi mu itsinda rikomeye ariko tugomba guhatana.”

“Ni byiza kuko ntabwo dushaka kwigereranya na bo tunganya imbaraga. Kenya na Estonie bari imbere yacu ku rutonde rwa FIFA.”

Ni ku nshuro ya mbere u Rwanda rugiye gukina n’ikipe itari iyo muri Afurika.

Muri rusange, iri rushanwa rizatangira ku wa Kane hakina amakipe ari mu itsinda rya kabiri, aho Aruba izahura na Macau saa 13:30, mu gihe saa 16:30, Tanzania izakina na Liechtenstein. Imikino izabera kuri Kigali Pelé Stadium.

Imikino izakomeza ku wa Gatanu, aho Kenya izakina na Estonie saa 18:00, mu gihe u Rwanda ruzakina na Granada saa 21:00 kuri Stade Amahoro.

Nubwo ibihugu bizitabira FIFA Series 2026 biri mu matsinda, buri kipe izakinamo umukino umwe mu buryo bumeze nka 1/2.

Ibihugu bizatsinda imikino yabyo ya mbere mu itsinda, bizakomeza mu gisa n’umukino wa nyuma naho ibyatsinzwe bihatanire umwanya wa gatatu.

Amatike ku mikino izabera muri Stade Amahoro iya make iri kuri 2000 Frw mu myanya isanzwe yaba hasi cyangwa hejuru, iruhande rwa VIP ni 5000 Frw, mu gihe muri VIP azaba ari 30.000 Frw.

Imyanya ya Skybox na VVIP yagenewe abazaba batumiwe muri iri rushanwa rizaba ribereye bwa mbere mu Rwanda.

Ku mikino izabera muri Kigali Pelé Stadium, imyanya isanzwe ni 2000 Frw, naho imyanya y’icyubahiro ni 20.000 Frw. Itike imwe izajya ifasha umukunzi w’umupira w’amaguru kureba imikino ibiri izajya ikinwa ku munsi.

Amatike aguriwa kuri *939*3*2#

 

 

 

Like This Post?

• Share On:

Related Posts

---