• Al Ahly yegukanye CAVB Men’s Club Championship 2026 itsinze Police VC

Al Ahly SC yo mu Misiri yegukanye Shampiyona Nyafurika y?Amakipe y?Abagabo muri Volleyball [CAVB Men’s Club Championship 2026], ihigitse Police VC yo mu Rwanda.

Ni nyuma yo gutsinda umukino wa nyuma wabahuje, ku maseti 3-0 (20-25, 21-25, 25-22) . Uyu mukino wabereye muri BK Arena ku mugoroba wo kuri uyu wa Gatandatu tariki ya 2 Gicurasi 2026.

Al Ahly ni yo kipe yegukanye iri rushanwa inshuro nyinshi kuko iyi ni inshuro ya 17 muri 47 rikinwe. Ni na yo kipe isoje iri rushanwa kuri iyi nshuro idatsinzwe umukino, cyangwa iseti mu mukino.

Police VC yo, ni uyu mukino wonyine itsinzwe kuko yageze ku wa nyuma itaratsindwa na rimwe. Iyi kipe ya Polisi y’u Rwanda, yegukanye umwanya wa kabiri. Yabaye Ikipe ya mbere yo mu Rwanda igeze ku mukino wa nyuma muri iri rushanwa mu mateka.

Ni mu gihe REG VC na yo y’u Rwanda yegukanye uwa gatatu nyuma yo gutsinda Petrojet Sporting Club na yo yo mu Misiri, amaseti 3-0 mu mukino wo guhatanira uwo mwanya wabereye muri BK Arena.

REG VC yabaye iya kabiri yo mu Rwanda yasoreje ku mwanya wa gatatu muri Shampiyona Nyafurika y?Amakipe y?Abagabo muri Volleyball.

Ikipe yasoreje ku mwanya nk’uyu ni Gisagara VC, yabaye iya gatatu mu 2022 ubwo iri rushanwa ryari ryabereye i Kelibia muri Tunisia.

Muri rusange, u Rwanda rwari ruhagarariwe n’amakipe ane muri iri rushanwa ryakiniwe bwa mbere i Kigali kuva ku wa 22 Mata 2026, rihuje amakipe 24 yo muri Afurika yatwaye ibikombe iwayo.

Ayo makipe ni Police igarukiye ku mukino wa nyuma, REG ya gatatu, Kepler VC yasezerewe muri 1/4, na APR VC yaviriyemo muri 1/8.

Iyi mikino yaberega ku bibuga bya BK Arena na Petit Stade, yagiye yitabirwa ku buryo bushimishije n’abakunzi ba Volleyball mu Rwanda, ndetse n’abayobozi mu nzego zitandukanye mu Rwanda.

 

Like This Post?

• Share On:

Related Posts

---