Yanditswe na: NDAYISENGA Clement
06/07/2026 14:52
Perezida w'u Burundi, Évariste Ndayishimiye, yakiriye i Bujumbura intumwa ziturutse muri Repubulika Iharanira Demokarasi ya Congo (RDC), zirimo abayobozi b'amashyaka atavuga rumwe n'ubutegetsi ndetse n'abahagarariye amadini, mu biganiro byibanda ku bibazo bya politiki biri muri iki gihugu.
Izi ntumwa zatumiwe na Perezida Ndayishimiye ku giti cye, mu rwego rw'inshingano ze nk'Umuyobozi w'Umuryango w'Ibihugu bya Afurika y'Iburasirazuba (EAC).
Umwe mu bayobozi batavuga rumwe na Leta ya RDC yavuze ati: "Twageze i Bujumbura ku butumire bwa Perezida Évariste Ndayishimiye kugira tuganire na we ku bibazo bya politiki biri mu gihugu cyacu."
Delly Sessanga, umwe mu bagize izo ntumwa, yatangaje ko kuri uyu wa Mbere bagomba guhura na Perezida Ndayishimiye kugira bamugezeho imyanzuro y'ibiganiro yagiranye na Perezida Félix Tshisekedi ubwo yari aherutse kugirira uruzinduko i Kinshasa.
Ibi biganiro bibaye mu gihe muri RDC hakomeje impaka zikomeye ku mugambi wo guhindura Itegeko Nshinga. Ishyaka riri ku butegetsi (UDPS), n'abarikomeye inyuma bashyigikiye uwo mugambi, mu gihe abatavuga rumwe na Leta bavuga ko ushobora gufungurira Perezida Félix Tshisekedi inzira yo kwiyamamariza manda ya gatatu nyuma yo kurangiza iya kabiri mu 2028.
Perezida Tshisekedi we yavuze ko niba Itegeko Nshinga rihinduwe bizakorwa binyuze muri kamarampaka, abaturage bakagira ijambo rya nyuma.
Umushinga w'itegeko riteganya iyo kamarampaka wamaze kwemezwa n'Inteko Ishinga Amategeko n'Umutwe wa Sena, hasigaye gusa ko ushyirwaho umukono na Perezida wa Repubulika.
Mu rwego rwo guhangana n'uwo mugambi, amashyaka atavuga rumwe n'ubutegetsi yashinze ihuriro ryiswe C64.
Martin Fayulu, umwe mu bayobozi b'iri huriro, yavuze ko Itegeko Nshinga ridakwiye guhindurwa, ashimangira ko Perezida Tshisekedi adakwiye gutekereza kuri manda ya gatatu.
Yagize ati: "Itegeko Nshinga ni umurongo utukura Perezida Tshisekedi adakwiye kurenga. Agomba kwibagirwa manda ya gatatu kuko tutazayemera."
Martin Fayulu uyobora ishyaka ECIDE, yaje ku mwanya wa gatatu mu matora ya Perezida wa RDC yabaye mu 2023.
Mu zindi ntumwa ziri i Bujumbura harimo Delly Sessanga uyobora ishyaka ENVOL, Jean-Marc Kabund wahoze ari Visi Perezida w'ishyaka UDPS ndetse akaba yarigeze kuba inshuti ya hafi ya Perezida Tshisekedi mbere yo kwirukanwa muri iryo shyaka, na Dieudonné Bolengetenge wo mu ishyaka Ensemble pour la République rya Moïse Katumbi, wagizwe uwa kabiri mu matora ya Perezida yo mu 2023.
Like This Post? Related Posts
