Yanditswe na: NDAYISENGA Clement
08/07/2026 07:43
Iran yatangaje ko yagabye ibitero bikomeye byifashishije misile n'indege zitagira abapilote (drone) ku birindiro bya gisirikare bya Leta Zunze Ubumwe za Amerika biri muri Bahrain na Kuwait, ivuga ko ari igisubizo ku bitero Amerika yari imaze kugaba ku butaka bwayo.
Ingabo zidasanzwe za Iran, Islamic Revolutionary Guard Corps (IRGC), zatangaje ko ishami ryazo rishinzwe ibikorwa byo mu nyanja n'iryo mu kirere ryakoranye mu gitero cyagabwe ku birindiro 85 bya Amerika bifite akamaro gakomeye.
Mu byagabweho ibitero harimo icyicaro cy'ingabo zirwanira mu mazi za Amerika, US Fifth Fleet, kiri muri Bahrain, ndetse n'ibirindiro by'indege bya Ali Al-Salem kiri muri Kuwait.
Iran yavuze kandi ko yagabye igitero cya drone ku birindiro bya Sheikh Isa biri muri Bahrain, ishimangira ko ibirindiro byose bya Amerika biri mu karere ubu bifatwa nk'intego zemewe za gisirikare. Ibi byatangajwe nyuma y'uko Bahrain yaburiye abaturage ikoresheje ibyuma biburira abantu ku nshuro ya kabiri muri icyo gitondo.
Mu itangazo ryayo, IRGC yavuze ko ibi ari "igisubizo cya mbere" ku byo yise ko Amerika yishe amasezerano yo guhagarika imirwano ndetse n'ayo yise amasezerano ya Islamabad, nyuma y'ibitero by'indege Amerika yagabye ku birindiro byo ku nkombe z'inyanja no ku bikorwa bitari ibya gisirikare mu duce twa Hormozgan na Mahshahr.
Ku rundi ruhande, Amerika yongeye kugaba ibitero kuri Iran nubwo yari yemeye guhagarika ibikorwa bya gisirikare mu gihe cy'iminsi irindwi y'ikiriyo cyo guherekeza uwari Umuyobozi w'Ikirenga wa Iran, Ali Khamenei.
Washington yavuze ko ibyo bitero byari igisubizo ku bitero byagabwe ku mato y'ubucuruzi anyura mu Strait of Hormuz, inzira y'ingenzi inyuramo ubucuruzi mpuzamahanga.
IRGC yanashinje Amerika kugerageza gutesha agaciro umuhango wo guherekeza Khamenei, ivuga ko Washington yashakaga kwitambika icyo yise "igikorwa cy'amateka".
Hagati aho, umwuka mubi hagati ya Tehran na Washington ukomeje gukaza umurego, ibintu bikomeje guteza impungenge z'uko amakimbirane ashobora gukwira mu karere k'Uburasirazuba bwo Hagati.
Like This Post? Related Posts
