Yanditswe na: NDAYISENGA Clement
08/07/2026 13:35
Ubuyobozi bw’Akarere ka Rubavu bwatangaje ko bwatangiye iperereza rigamije kumenya icyateye urupfu rw’umugabo utaramenyekana imyirondoro ye, wasanzwe mu cyobo cya metero imwe yapfuye.
Uwo mugabo uri mu kigero cy’imyaka 35 y'amavuko yasanzwe muri icyo cyobo mu gitondo cyo ku wa Kabiri, tariki ya 07 Nyakanga 2026, mu Murenge wa Rubavu, mu Kagari ka Murara, mu Mudugudu wa Gahinga.
Amakuru y’urupfu rwe yatanzwe na nyir’urugo rwari ruri hafi y’aho icyo cyobo giherereye mu Karere ka Rubavu, mu Ntara y'Iburengerazuba.
Abaturage bavuga ko urupfu rwa nyakwigendera wari usanzwe akora akazi k'ubunyonzi rufitanye isano no kujya mu buraya nubwo ubuyobozi buvuga ko iperereza rikomeje.
Umunyamabanga Nshingwabikorwa w’Umurenge wa Rubavu, Rwibasira Jean Bosco, yavuze ko hakomeje gukorwa iperereza kugira ngo hamenyekane niba urupfu rwe rwaratewe n’impanuka cyangwa izindi mpamvu.
Yagize ati:“Uyu mugabo yasanzwe mu cyobo cya metero imwe yapfuye. Kugeza ubu ntituramenya niba yaba yaraguyemo kubera ubusinzi, niba hari abagizi ba nabi baba baramwishe bakamujugunyamo cyangwa niba hari ikindi cyaba cyabiteye, kuko byabaye mu ijoro. Inzego z’umutekano zatangiye iperereza kugira ngo ukuri kumenyekane.”
Rwibasira yasabye abaturage gukomeza kuba maso, gutaha hakiri kare no gutanga amakuru ku gihe igihe babonye ibintu bidasanzwe, kugira ngo ibyaha bishoboka bibashe gukumirwa.
Umurambo wa nyakwigendera woherejwe ku Bitaro bya Gisenyi kugira ngo ukorerwe isuzuma ry’ubuvuzi, mu gihe inzego zibishinzwe zikomeje gushaka amakuru y’imyirondoro ye n’abashobora kuba bafitanye isano na we.
