Yanditswe na: NSENGIYUMVA J Damascene
11/07/2026 23:14
Guverinoma ya Ukraine yamaganye yivuye inyuma amagambo ya Minisitiri w’Ububanyi n’Amahanga w’u Burusiya, Sergey Lavrov, wavuze ko Kyiv ishyigikiye umutwe wa AFC/M23 urwanira mu burasirazuba bwa Repubulika Iharanira Demokarasi ya Congo (RDC). Ukraine yavuze ko ayo magambo ari ibinyoma bidafite ishingiro, ishimangira ko nta ruhare ifite mu makimbirane yo ku mugabane wa Afurika.
Ibi bibaye mu gihe u Burusiya na Ukraine bikomeje guhatanira
gushimangira umubano wabyo n’ibihugu bya Afurika, mu gihe intambara ibihuza
ikomeje kuva mu ntangiriro za 2022.
Mu
ruzinduko yagiriye mu Burundi ku wa 10 Nyakanga 2026, Sergey Lavrov yavuze ko
Ukraine iri mu bihugu bifasha umutwe wa M23, ashinja Kyiv kwivanga mu bibazo
by’umutekano byo muri Afurika.
Ibyo
yabitangaje nyuma y’ibiganiro yagiranye na Minisitiri w’Ububanyi n’Amahanga w’u
Burundi, Édouard Bizimana, mbere yo kwakirwa na Perezida Évariste Ndayishimiye,
unayoboye Umuryango wa Afurika Yunze Ubumwe (AU).
Lavrov
yagize ati: "Turabona ibikorwa byo kwivanga kw’amahanga mu bibazo bya
Afurika. M23 ishyigikiwe n’amahanga harimo n’Abanya-Ukraine, kandi ibyo
turabizi."
Yakomeje
avuga ko Ukraine ishaka gukorana n’imitwe irwanya za guverinoma zemewe kugira
ngo yagure uruhare rwayo muri politiki ya Afurika no guhungabanya ibihugu
bifitanye umubano n’u Burusiya.
Icyakora,
Minisiteri y’Ububanyi n’Amahanga ya Ukraine yahise isohora itangazo rihakana
ayo makuru.
Umuvugizi
wayo, Heorhii Tykhyi, yavuze ko ibyo Lavrov yatangaje ari ibirego bidafite
gihamya.
Yagize
ati: "Ukraine ntiyigeze ishyigikira M23 cyangwa
indi mitwe yitwaje intwaro muri Afurika. Aya ni amakuru y'ibinyoma akomeje
gukwirakwizwa n’u Burusiya."
Yakomeje
avuga ko igihugu cye kitivanga mu ntambara zo muri Afurika, ahubwo ko u
Burusiya ari bwo bushinjwa gukorana n’imitwe yitwaje intwaro no guteza
umutekano muke mu bihugu bitandukanye.
Ukraine
yanashinje Moscow gushaka kurangaza amahanga no gutesha agaciro ibikorwa
by’ubuhuza biri gukorwa mu karere k’Ibiyaga Bigari.
Intambara
yo mu burasirazuba bwa RDC imaze imyaka myinshi ikomeje, aho AFC/M23 ivuga ko
iharanira kurengera uburenganzira n’umutekano by’Abanye-Congo bavuga ko bamaze
igihe bahohoterwa no guhezwa.
Ku
rundi ruhande, Guverinoma ya RDC ikomeje gukorana n’ingabo zayo (FARDC), ingabo
z’u Burundi, umutwe wa Wazalendo ndetse na FDLR mu rugamba rwo guhangana na M23.
FDLR ni umutwe washinzwe n’abagize uruhare muri Jenoside yakorewe
Abatutsi mu 1994, kandi u Rwanda rumaze igihe ruwushinja guhungabanya umutekano
warwo no gukorana n’ingabo za RDC mu bikorwa byawo.
