• Ubuzima / IBYOREZO

Sosiyete ikora inkingo n'imiti ya Moderna yatangaje ko yatangiye igerageza rya mbere ku bantu ry'urukingo rwitezweho kurinda virusi ya Ebola yo mu bwoko bwa Bundibugyo (Bundibugyo ebolavirus), ubwoko butari bwagira urukingo rwemejwe gukoreshwa kugeza ubu.

Iri gerageza riri gukorerwa muri Canada, aho abantu bakuru bagera kuri 80 bafite ubuzima bwiza ari bo biteganyijwe ko bazaryitabira. Ni icyiciro cya mbere cy'ubushakashatsi kigamije gusuzuma niba uru rukingo rufite umutekano ku muntu no kureba niba rushobora gutuma umubiri wihangira ubwirinzi (immune response) burwanya iyi virusi.

Urukingo ruri kugeragezwa rwitwa mRNA-1469, rukaba rukoresha ikoranabuhanga rya messenger RNA (mRNA), ari na ryo Moderna yakoresheje mu gukora urukingo rwa COVID-19. Ubu buryo bufasha umubiri kwigira uburyo bwo kumenya no kurwanya virusi utarinze guterwa n'indwara ubwayo.

Ubushakashatsi buri gukorwa ku bufatanye n'Umuryango Coalition for Epidemic Preparedness Innovations (CEPI), ushyigikira ubushakashatsi bugamije gutegura inkingo z'indwara zishobora guteza ibyorezo ku rwego rw'isi.

Abashakashatsi bazakurikirana uko abitabiriye igerageza bakira uru rukingo, barebe niba nta ngaruka zikomeye rutera ndetse banapime niba rutuma umubiri ukora ubwirinzi buhagije bwo guhangana na virusi ya Ebola yo mu bwoko bwa Bundibugyo.

Moderna yavuze ko mu gihe uru rukingo rwazemerwa gukoreshwa nyuma yo gutsinda ibindi byiciro by'igerageza no kwemezwa n'inzego zibishinzwe, izatanga nibura inkingo 500.000 ku bihugu bifite ubukungu buke n'ibiciriritse ku giciro cyoroheye abaturage.

Iri terambere rije mu gihe Repubulika Iharanira Demokarasi ya Congo ikomeje guhangana n'icyorezo cya Ebola yo mu bwoko bwa Bundibugyo, mu gihe ibihugu n'imiryango mpuzamahanga bikomeje kongera imbaraga mu gushaka inkingo n'imiti byafasha gukumira no kuvura iyi ndwara.

Virusi ya Ebola ni imwe mu ndwara zandura zihitana ubuzima bw'abantu benshi iyo ititaweho hakiri kare. Ikwirakwira binyuze mu guhura n'amaraso cyangwa andi matembabuzi y'umuntu cyangwa inyamaswa yanduye. Mu bimenyetso byayo harimo umuriro ukabije, kubabara umutwe, kuruka, impiswi ndetse no kuva amaraso mu bihe bikomeye.

Impuguke mu buzima zivuga ko gutangira igerageza ry'urukingo rwa Bundibugyo ari intambwe ikomeye mu rugamba rwo gushaka uburyo bwo gukingira ubu bwoko bwa Ebola, bwagiye buteza ibyorezo mu bihugu bimwe byo muri Afurika ariko bukaba butari bwarabonerwa urukingo rwemewe.

Mu gihe ubushakashatsi bwatanga umusaruro mwiza, uru rukingo rwashobora kongera ubushobozi bw'isi bwo gukumira ibyorezo bya Ebola no kurinda abaturage, cyane cyane abo mu bihugu bikunze kwibasirwa n'iyi ndwara.

 

Like This Post? Related Posts
Andika igitekerezo
Recent Comments