Yanditswe na: NDAYISENGA Clement
11/08/2026 07:09
Abantu barenga 132 bamaze gutangazwa ko bahitanywe n’umutingito ukomeye wibasiye uburengerazuba bwa Colombia, mu gihe abashinzwe ubutabazi bakomeje gushakisha abarokotse ndetse n’ababa bakiri munsi y’ibisigazwa by’amazu yasenyutse.
Uwo mutingito wari ufite ubukana bwa magnitude 7.4 ku gipimo cya Richter wabereye mu ntara ya Chocó, hagati y’imijyi ya Medellín na Cali, ariko ingaruka zawo zageze no mu yindi mijyi ikomeye nka Cali, Pereira na Manizales.
Abayobozi batangaje ko umubare w’abapfuye ushobora kwiyongera, kuko hari impungenge ko hari abantu benshi bashobora kuba bagifunzwe n’ibisigazwa by’inyubako zasenyutse. Amatsinda y’abatabazi, abapolisi n’abasirikare bakomeje ibikorwa byo gushakisha no gutabara abari mu kaga.
Intara ya Risaralda, izwi cyane mu buhinzi bw’ikawa, ni imwe mu zagizweho ingaruka zikomeye, aho umujyi wa Pereira wagize ibyangiritse byinshi ndetse hakaba hari amazu yasenyutse cyangwa akangirika bikomeye.
No mu murwa mukuru Bogotá, abaturage bumvise umutingito ukomeye, aho ibikoresho bimwe na bimwe byanyeganyezaga, ariko kugeza ubu nta byangiritse bikomeye byatangajwe muri uwo mujyi. Uwo mutingito wanumvikanye mu bihugu bituranye na Colombia birimo Venezuela, Ecuador na Panama.
Perezida wa Colombia, Abelardo de la Espriella, yatangaje ko igihugu kiri mu bihe bidasanzwe kugira ngo ibikorwa byo gutabara no gufasha abahuye n’iki kibazo bishobore gukorwa vuba.
Abahanga mu by’imitingito bavuga ko Colombia iri mu gace gafite ibyago byinshi by’imitingito kubera aho amasahani y’isi ahurira, kandi abaturage basabwe kwitwararika kuko hashobora gukurikiraho indi mitingito mito nyuma y’uyu ukomeye.
Like This Post? Related Posts
