• Russia : Ishyaka rya Vladimir Poutine ryegukanye imyanya 355 mu nteko ishinga amategeko

Ishyaka United Russia (Uburusiya Bumwe) ryegukanye imyanya 355 kuri 450 igize Inteko Ishinga Amategeko y’u Burusiya (Duma), nk’uko imibare y’ibanze yatangajwe ku wa Mbere na Komisiyo Nkuru y’Amatora ibigaragaza.

Uyu mubare w’imyanya ni wo munini iri shyaka ritigeze rigira kuva ryashingwa, ukaba urenze uwo ryari ryagezeho mu 2016 ubwo ryabonaga imyanya 343.

Amatora yabaye mu gihe cy’iminsi itatu, kuva ku wa 18 kugeza ku wa 20 Nzeri, akaba ari yo ya mbere abaye kuva u Burusiya butangiza igitero cyagutse kuri Ukraine mu 2022.

Kugeza ubwo abarenga 95% by’amajwi bari bamaze kubarwa, United Russia yari imaze kubona hafi 58% by’amajwi. Ishyaka rya gikomunisiti ryaje ku mwanya wa kabiri n’imyanya 40, rikurikirwa na LDPR rifite imyanya 25, naho New People ribona imyanya 20.

Perezida wa Komisiyo Nkuru y’Amatora, Ella Pamfilova, yavuze ko abarenga 59% by’abari bafite uburenganzira bwo gutora bitabiriye amatora.

Aya matora yabaye mu gihe abatavuga rumwe n’ubutegetsi bari bafite imbogamizi zikomeye. Amashyaka anenga ubutegetsi bwa Kremlin cyangwa atavuga rumwe n’intambara yo muri Ukraine ntabwo yemerewe kwitabira aya matora ku rwego rw’igihugu, mu gihe abakandida benshi batavuga rumwe n’ubutegetsi na bo batemerewe kwiyamamaza.

Biteganyijwe ko amanita  ya nyuma  y’ibyavuye  muri aya matora bizatangazwa mu mpera z’iki cyumweru.

 

Like This Post?

• Share On:

Related Posts

---