Yanditswe na: NDAYISENGA Clement
22/09/2026 10:34
Amakuru atangazwa n’itangazamakuru ryo mu karere avuga ko hari abasirikare ba Tanzania binjiye mu Burundi, aho bivugwa ko bagiye gufasha mu bikorwa bya gisirikare biri gutegurwa mu Burasirazuba bwa Repubulika Iharanira Demokarasi ya Congo (RDC), cyane cyane mu gace ka Minembwe na Point Zéro.
Aya makuru avuga ko abo basirikare binjiye mu Burundi banyuze ku mupaka wa Kagunga, muri Tanzania, mbere yo gukomeza berekeza i Nyanza-Lac. Bivugwa ko bageze muri ako gace bahinduriwe imyambaro ya gisirikare, bambikwa imyambaro y’Ingabo z’u Burundi, nyuma bajyanwa mu bice bitandukanye by’u Burundi.
Raporo yatangajwe ivuga ko igice cy’abo basirikare cyoherejwe mu gace ka Luvungi, mu Kibaya cya Ruzizi, mu gihe abandi boherejwe mu Rugombo, mu Ntara ya Cibitoke, hafi y’umupaka w’u Burundi n’u Rwanda. Amakuru avuga ko ibi byabaye ku wa 15 Nzeri 2026.
Aya makuru akomeza avuga ko imwe mu nshingano z’abo basirikare yaba ari ugufunga cyangwa kugenzura umuhanda uhuza Kaziba na Minembwe. Uyu muhanda ufite akamaro mu ngendo zihuza uduce two mu misozi miremire ya Kivu y’Amajyepfo, kandi kuwugenzura bishobora kugira uruhare mu kugabanya ingendo z’abantu n’ibikoresho byerekeza mu gace ka Minembwe.
Raporo zivuga ko nyuma yo kugenzura uwo muhanda, ibikorwa bya gisirikare bishobora gukomeza byerekeza kuri Point Zéro, agace gafite akamaro mu bikorwa bya gisirikare byo mu misozi miremire ya Kivu y’Amajyepfo. Point Zéro iherereye hafi ya Minembwe kandi ifatwa nk’ahantu h’ingenzi mu kugenzura inzira zihuza Minembwe n’utundi duce twa Uvira, Mwenga, Fizi na Baraka.
Hari kandi amakuru avuga ko Masango, muri Teritwari ya Uvira, ishobora kuba imwe mu nzira cyangwa ahantu h’ingenzi ibikorwa bya gisirikare byateganyijwe kunyura. Muri rusange, inzira ivugwa ko ishobora gukurikizwa ni Kagunga, Nyanza-Lac, Luvungi cyangwa Rugombo, Kaziba-M inembwe, Point Zéro ndetse na Minembwe.
Aya makuru aje mu gihe imirwano ikomeje mu misozi miremire ya Kivu y’Amajyepfo, aho imitwe yitwaje intwaro n’ingabo zishyigikiye ubutegetsi bwa Kinshasa bakomeje guhangana. Minembwe n’uturere tuyikikije tumaze igihe turi mu bice byibandwaho mu bikorwa bya gisirikare kubera umutekano muke n’akamaro kabyo mu karere.
Amakuru avuga ku kuba abasirikare ba Tanzania bari mu Burundi no kuba bashobora kugira uruhare mu bikorwa bigana kuri Minembwe ashingiye ku makuru yatangajwe n’itangazamakuru ndetse n’amasoko y’umutekano, ariko kugeza ubu ntabwo hagaragajwe gihamya yigenga yemeza ko Tanzania yohereje abo basirikare muri icyo gikorwa cyangwa ko koko bambitswe imyambaro y’Ingabo z’u Burundi.
Ibi bibaye kandi mu gihe Tanzania, Burundi na Repubulika Iharanira Demokarasi ya Congo bikomeje kugira uruhare mu biganiro n’ibikorwa bigamije gukemura ibibazo by’umutekano mu karere k’Ibiyaga Bigari.
Ku bw’ibyo, amakuru avuga ku bikorwa bya gisirikare byaba birimo abasirikare ba Tanzania bishobora gukomeza ibibazo by'umutekano mu Karere aho kubishakira ibisubizo bya politiki.
Like This Post? Related Posts
