• Kenya: Urukiko rwahagaritse by’agateganyo uruganda rwa Dangote i Lamu

Urukiko rushinzwe ibidukikije n’ubutaka rwa Malindi muri Kenya rwahagaritse by’agateganyo ibikorwa byo kwitegura kubaka uruganda rutunganya ibikomoka kuri peteroli rwa Dangote Group mu Karere ka Lamu.

Uyu mwanzuro wafashwe nyuma y’ikirego cy’abaturage 133 bavuga ko ubutaka bwagenewe kubakwaho uru ruganda ari umurage bahawe n’abakurambere babo, kandi ko babukoresha mu buhinzi n’ubworozi.

Umucamanza Jane Onyango yategetse ko nta gikorwa kigomba gukorerwa kuri ubwo butaka kugeza ku wa 14 Ukwakira 2026, ubwo urukiko ruzongera kuburanisha iki kibazo.

Dangote Group yavuze ko icyemezo cy’urukiko kitahagaritse umuhango wo gutangiza ku mugaragaro uyu mushinga, ariko ko gishobora kugira ingaruka ku bindi bikorwa byari biteganyijwe.

Biteganyijwe ko uru ruganda nirwuzura ruzajya rutunganya utugunguru 700,000 tw’ibikomoka kuri peteroli ku munsi. Umushinga uteganyijwe gutwara hagati ya miliyari 15 na 16 z’amadolari ya Amerika, ukarangira mu 2030.

Dangote Group ivuga ko uru ruganda ruzafasha Kenya ndetse n’ibindi bihugu byo mu karere kugabanya icyuho kiri mu bikenerwa by’ibikomoka kuri peteroli.

Like This Post?

• Share On:

Related Posts

---