• Abahuza ba AU bagiranye ibiganiro n’ubuyobozi bwa AFC/M23 i Goma

Itsinda ry’abahoze ari Abakuru b’Ibihugu rishinzwe gufasha Umuryango wa Afurika Yunze Ubumwe (AU) mu bikorwa by’ubuhuza ku kibazo cy’umutekano muke mu Burasirazuba bwa Repubulika Iharanira Demokarasi ya Congo (RDC) ryageze i Goma.

Ryagiye kugirana ibiganiro n’ubuyobozi bukuru bw’Ihuriro rya AFC/M23, ku nzira y’amahoro, no guhagarika intambara mu rwego rwo kugera ku mutekano n’amahoro arambye.

Amashusho yafashwe agaragaza aba bayobozi batambuka ku itapi itukura, nka kumwe Abakuru b’Ibihugu n’abandi banyacyubahiro basuye ibihugu bigenda, ndetse banyuma imbere y’abarwanyi ba AFC/M23 bazamuye imbunda nk’icyubahiro bahawe.

Iri tsinda ryageze i Goma kuri uyu wa Mbere, tariki ya 5 Ukwakira 2026, ririmo Uhuru Kenyatta wahoze ayobora Kenya, Mokgweetsi Masisi wahoze ayobora Botswana na Sahle-Work Zewde wahoze ayobora Ethiopia.

Catherine Samba-Panza wahoze ayobora Repubulika ya Centrafrique ntiyitabiriye kubera impamvu z’ubuzima, mu gihe Olusegun Obasanjo wahoze ayobora Nigeria na we atari kumwe n’abandi kubera gushyirwa mu bahuza b’ikibazo cy’umwuka mubi uri hagati ya Ethiopia na Eritrea.

Aba bahuza bakiriwe muri Serena Hotel i Goma n’abayobozi bakuru ba AFC/M23, barimo Corneille Nangaa uyobora iri Huriro, Bertrand Bisimwa umwungirije ndetse n’abandi bayobozi bakuru mu gisirikare cya AFC/M23.

Ibiganiro by’iri tsinda byibanze ku nzira y’amahoro igamije gushaka umuti w’ikibazo cy’umutekano muke umaze igihe ugaragara mu Burasirazuba bwa RDC.

Aba bahuza ba AU baganiriye n’ubuyobozi bwa AFC/M23 mu gihe ibikorwa bigamije gushakira amahoro n’umutekano akarere k’Ibiyaga Bigari bikomeje.

Ibiganiro nk’ibi bifatwa nk’imwe mu nzira zishobora gufasha impande zirebwa n’amakimbirane kugera ku bwumvikane binyuze mu biganiro bya politiki.

Uburasirazuba bwa RDC bumaze igihe buhanganye n’ikibazo cy’umutekano muke, aho abaturage bakomeje guhura n’ingaruka z’imirwano n’ubuhunzi. Gushaka umuti urambye w’iki kibazo ni imwe mu ngingo zikomeje kwitabwaho n’imiryango yo mu karere ndetse n’Umuryango wa Afurika Yunze Ubumwe.

Ibiganiro byabereye i Goma bishimangira ko inzira y’ibiganiro ikomeje kugira umwanya mu bikorwa bigamije gushakira umuti ikibazo cy’umutekano muke muri aka gace.

Kugeza ubu, intego nyamukuru y’ibi biganiro ni uguteza imbere inzira y’amahoro no gushaka uburyo bwo kurangiza amakimbirane binyuze mu biganiro, hagamijwe ko abaturage bo mu Burasirazuba bwa RDC babona amahoro n’umutekano birambye.

 

 

 

Like This Post?

• Share On:

Related Posts

---