Yanditswe na: NDAYISENGA Clement
08/10/2026 07:43
Abasirikare ba Eritrea binjiye mu majyaruguru ya Ethiopia, mu karere ka Tigray, aho imirwano hagati y’ingabo za Leta ya Ethiopia n’abarwanyi ba TPLF yongeye kubura.
Abaturage bo mu mujyi wa Adigrat babwiye BBC ko babonye amakamyo menshi ya gisirikare atwaye abasirikare ba Eritrea yerekeza mu bice biri hagati ya Adigrat na Mekelle.
Abaturage bavuga ko izo ngabo zanyuze ku mupaka wa Zalambessa, zigakomereza i Adigrat mbere yo kwerekeza mu gace ka Edaga Hamus. Umwe mu batangabuhamya yavuze ko yabonye amakamyo agera kuri 40 atwaye abasirikare, mu gihe undi yavuze ko yabonye hagati ya 20 na 30, harimo amakamyo atwaye intwaro ziremereye ndetse n’izirasa mu kirere.
Hari n’andi makuru avuga ko amakamyo agera kuri 60 yabonywe yerekeza mu misozi iri hafi ya Edaga Hamus. Icyakora, BBC yavuze ko itabashije kwigenga kugenzura umubare nyawo w’abasirikare cyangwa kwemeza amashusho n’amafoto biri gukwirakwizwa ku mbuga nkoranyambaga.
Imirwano muri Tigray yongeye gukomera nyuma y’igihe habayeho umwuka mubi hagati ya Leta ya Ethiopia n’umutwe wa TPLF uyobora ako karere. Impande zombi zagiye zishinjanya kutubahiriza amasezerano y’amahoro yasinywe mu 2022, yari yarahagaritse intambara yamaze hafi imyaka ibiri.
Mu minsi ishize, abarwanyi ba TPLF bavanywe mu mujyi wa Mekelle, umurwa mukuru wa Tigray, ubu ukaba ugenzurwa n’ingabo za Leta ya Ethiopia. Abaturage bo mu bindi bice, birimo Wukro, na bo batangaje ko babonye ingabo za Ethiopia n’imitwe izishyigikiye zinjira muri ako gace nyuma y’imirwano yakoreshejwemo intwaro ziremereye.
Kugaruka kw’ingabo za Eritrea muri Tigray, niba aya makuru yemezwa, byateye ubwoba abaturage benshi bibuka uruhare Eritrea yagize mu ntambara yo muri Tigray yabaye hagati ya 2020 na 2022. Muri iyo ntambara, ingabo za Eritrea zari zarinjiye muri Ethiopia zifatanya n’ingabo za Leta kurwanya TPLF.
Leta ya Ethiopia ishinja Eritrea kugira uruhare muri iyi mirwano mishya no gufasha TPLF, ariko Eritrea yahakanye ibyo birego. Abayobozi ba Eritrea bavuga ko amakuru avuga ko ingabo zayo ziri muri Tigray atari ukuri.
Umuyobozi mukuru muri Leta ya Ethiopia, Abraham Belay, yavuze ko Eritrea ifite uruhare rutaziguye muri iyi ntambara. Yatangaje kandi ko hari abasirikare ba Eritrea bishwe ndetse n’abandi bafashwe, anaburira ko Ethiopia ishobora gufata ingamba zikomeye.
Kongera kugaragara kw’ingabo za Eritrea muri Tigray byateje impungenge ko amakimbirane ashobora kurenga ku mipaka ya Ethiopia akagira ingaruka ku mutekano w’akarere kose k’Ihembe rya Afurika.
Abasesenguzi batinya ko intambara ndende ishobora kongera guteza ibibazo by’ubuhunzi, kubura ibiribwa n’ibindi bibazo by’ubutabazi byigeze kugaragara muri Tigray.
Mu gihe imirwano ikomeje, haracyari impungenge ko amasezerano y’amahoro yo mu 2022 ashobora gusenyuka burundu, bigatuma Ethiopia na Eritrea byongera kwisanga mu makimbirane afunguye.
Kugeza ubu, amakuru ku mubare w’ingabo za Eritrea zaba zinjiye muri Tigray n’aho ziri neza ntaremezwa ku buryo butomoye.
Like This Post? Related Posts
