• Afurika y’Epfo: Imodoka 24 zatwikirijwe, amaduka y’abanyamahanga arasahurwa mu myigaragambyo yaranzwe n’urugomo

Polisi ya Afurika y’Epfo yatangaje ko nibura imodoka 24 zatwitswe, mu gihe amaduka acururizwamo n’abanyamahanga yasahuwe, nyuma y’imyigaragambyo yo kwamagana abimukira yaranzwe n’urugomo mu mijyi ya Johannesburg na Durban.

Urwo rugomo rwabaye ku wa Kane, ubwo imyigaragambyo yadukiraga i Soweto, agace gatuwe cyane kari mu nkengero z’umujyi wa Johannesburg, ndetse no mu mujyi wa Durban, umwe mu mijyi ikomeye y’ubucuruzi n’ubwikorezi bwo mu nyanja muri Afurika y’Epfo.

Iyi myigaragambyo ibaye mu gihe umwuka w’ubwumvikane buke ukomeje kwiyongera ku kibazo cy’abimukira, cyane cyane nyuma y’icyemezo cy’urukiko gitegeka leta gukuraho inzitizi zari zarashyizweho, zikabuza bamwe mu bimukira gusaba ubuhungiro.

Muri Afurika y’Epfo, imyigaragambyo yo kwamagana abanyamahanga imaze igihe igaragara, aho abimukira, cyane cyane abaturuka mu bihugu bituranye n’icyo gihugu, bakunze gushinjwa n’abamwe mu baturage baho kuba intandaro y’ibibazo birimo ubushomeri, ubukene n’izamuka ry’ibyaha.

Icyakora, ibyo birego ntibihindura abanyamahanga bose abagizi ba nabi, kandi urugomo rubibasira rwagiye rutera impungenge ku mutekano wabo.

Amakuru avuga ko imyigaragambyo yo ku wa Kane yarushijeho gukara i Durban nyuma y’ibirego by’uko umunyamahanga yakubise umwe mu bari bitabiriye imyigaragambyo. Polisi yatangaje ko abantu batatu b’abanyamahanga batawe muri yombi mu iperereza rijyanye n’icyo kibazo.

Mu mujyi wa Durban, uri mu ntara ya KwaZulu-Natal, abigaragambyaga bateraniye imbere y’ikigo cya leta gishinzwe kwakira impunzi, basaba ko gihagarika kwakira ubusabe bw’abashaka ubuhungiro.

Polisi yakoresheje amasasu ya kawucu mu rwego rwo gutatanya abigaragambyaga no kugenzura uko ibintu byari byifashe. Hagati aho, amaduka n’ibindi bikorwa by’ubucuruzi byo mu mujyi rwagati byari byafunze kubera impungenge z’umutekano.

Urugomo rwibasiye amaduka n’ibinyabiziga rushobora kugira ingaruka zikomeye ku mibereho y’abacuruzi, abakozi ndetse n’abaturage muri rusange. Abimukira bakora ubucuruzi buciriritse na bo bashobora guhomba imitungo yabo, mu gihe abaturage bashobora kubura serivisi n’ibicuruzwa bisanzwe babona hafi yabo.

Ikibazo cy’abimukira muri Afurika y’Epfo gikomeje kuba ingingo ikomeye mu mpaka za politiki n’imibereho y’abaturage, cyane cyane mu gihe igihugu gihanganye n’ubushomeri n’ubusumbane mu bukungu. 

Abaharanira uburenganzira bwa muntu bakunze gusaba inzego z’umutekano n’iz’ubutabera kurinda abantu bose, hatitawe ku bwenegihugu bwabo, no gukurikirana mu mategeko abashishikariza cyangwa bagira uruhare mu bikorwa by’urugomo.

Like This Post?

• Share On:

Related Posts

---