Yanditswe na: NSENGIYUMVA J Damascene
27/10/2026 13:33
Leta y’u Burusiya yemeje ko Abanya-Uganda 11 bari barinjijwe mu gisirikare cy’icyo gihugu biciwe mu ntambara yo muri Ukraine, mu gihe abandi 16 baburiwe irengero ariko bikekwa ko bapfuye.
Aya makuru ari muri raporo ya
Ambasade ya Uganda i Moscow, agaragaza ko Abanya-Uganda 27 ari bo bemejwe ko
bapfuye cyangwa bakekwa ko bapfuye ubwo bari mu gisirikare cy’u Burusiya.
Mu ibaruwa yo ku wa 17 Ukwakira 2026,
Ambasaderi wa Uganda mu Burusiya, Moses Kizige, yamenyesheje Umunyamabanga
Uhoraho muri Minisiteri y’Ububanyi n’Amahanga ya Uganda ko abayobozi b’u
Burusiya batanze ayo makuru nyuma y’ubusabe bwa Ambasade.
Ikinyamakuru ChimpReports cyabonye
inyandiko y’u Burusiya yo ku wa 8 Ukwakira, isubiza ubusabe bwa Ambasade
yashakaga kumenya aho Abanya-Uganda bari barinjiye mu gisirikare cy’u Burusiya
bari.
Ambasaderi Kizige yavuze ko ubwo busabe
bwakurikiye ibiganiro yagiranye kuri telefoni muri Kanama n’umugabo witwa
Innocent Kato, wavuze ko ahagarariye imiryango y’Abanya-Uganda bakekwaga ko
bari mu gisirikare cy’u Burusiya.
Nyuma yo guhabwa amakuru ari kuri
pasiporo zabo, Ambasade yayagenzuje ifatanyije n’Urwego rwa Uganda rushinzwe
Ubwenegihugu n’Abinjira n’Abasohoka, maze ku wa 19 Kanama isaba abayobozi b’u
Burusiya amakuru ku irengero ry’abo Banya-Uganda.
Abemejwe ko bapfuye ni Ronald Bugiri,
John Male, Francis Ngabirano, Innocent Agaba, Levi Kasule, Bigirwa Mugisa,
Richard Twine, Junior Moses Mawejje, Pius Byamugisha, David Buyondo na Godfrey
Kamugira.
Abandi 16 baburiwe irengero ni Maxima
Tindyebwa, Darius Twebaze, Alex Katurebe, Miiro Mukasa, Eric Kwesiga, Kosiaa
Kusima, Johnson Kakuru, Edwin Musasizi, Vicent Musisi, Nelson Mugyenyi, Alex
Akanshabira, David Kiwanuka Ssekisibo, Henry Rwakiziri Bamutina, Stephen
Muhame, William Kyoffa na Nelson Lukwita.
Ambasade yavuze ko bishoboka cyane ko aba
baburiwe irengero bapfuye, nubwo imibiri yabo itabonetse. Ambasaderi Kizige
yongeyeho ko nta makuru ahari agaragaza ko bafashwe nk’imbohe z’intambara.
Yasabye ko imiryango y’abemejwe ko
bapfuye yamenyeshwa byihutirwa kugira ngo itangire gukurikirana indishyi
n’ibindi byagenerwaga ababo.
Yanagaragaje impungenge ko Ambasade itari
yakirwa amakuru n’imiryango ya Baker Mwesigye, Alex Mutesigensi na Edson
Kamwesigye, urupfu rwabo rwari rwarigeze kwemezwa na Minisiteri y’Ingabo y’u
Burusiya.
ChimpReports ivuga ko aba batatu basa
n’abatari ku rutonde rushya rw’abantu 11, bikaba byatuma umubare
w’abamenyekanye amazina kandi bemejwe ko bapfuye ugera kuri 14.
Abandi Banya-Uganda batanu baracyari mu
gisirikare cy’u Burusiya
Inyandiko ya Ambasade igaragaza ko
Abanya-Uganda batanu bakiri mu gisirikare cy’u Burusiya. Ni Rogers Mwebaze,
Evarist Barigye, Honest Mugabi, Eric Kisakye na Ronald Samula Tenywa.
Ambasaderi Kizige yavuze ko bazasezererwa
mu gisirikare igihe amasezerano yabo azaba arangiye. Icyakora, iyo nyandiko
ntiyagaragaje igihe basinyiye amasezerano, igihe azamara cyangwa niba barinjiye
mu gisirikare ku bushake bwabo.
Undi Munya-Uganda witwa Robert Tumwebaze
we yagaragajwe nk’uwasezerewe mu gisirikare cy’u Burusiya. Ambasaderi yavuze ko
yari yaratorotse abakozi ba Ambasade bari kumwe na we kuri gare ya gari ya
moshi, nyuma yo kuva mu bitaro bya gisirikare i Nizhni Novgorod. Nta makuru
yatanzwe ku buryo yatorotse cyangwa aho aherereye.
Ambasade yasabye imiryango ishakisha abayo bakekwa ko barwanira muri Ukraine gutanga amakuru ari kuri pasiporo zabo, kugira ngo yifashishwe mu kubashakira amakuru ku bayobozi b’u Burusiya.
