• Indonesia: Imyigaragambyo i Yogyakarta yahindutse imirwano, abapolisi baterwa amabuye n’ibiturika

Imvururu zikomeye zadutse mu mihanda yo mu mujyi wa Yogyakarta muri Indonesia kuri uyu wa Gatatu, nyuma y’uko bamwe mu bigaragambyaga batangiye gutera abapolisi amabuye n’ibiturika, imyigaragambyo yari yabanje kugenda mu mahoro ihinduka imirwano.

Amashusho yafashwe agaragaza abapolisi bashinzwe guhosha imvururu bari imbere bitwaje ingabo zo kwikingira, banakoresha imodoka zirasa amazi kugira ngo batatanye abigaragambya. Na bo bagaragara batera ibishashi by’umuriro, ibiturika n’ibindi bintu ku bapolisi.

Mu gice kimwe cy’ayo mashusho, bamwe mu bigaragambya bagaragara bagusha umupolisi hasi, bakamukubita.

Umuvugizi wa Polisi ya Yogyakarta, Kombes Pol Ihsan, yavuze ko imyigaragambyo yari yabanje kugenda neza, ariko nyuma hakaza abantu batamenyekanye bagatangira ibikorwa by’ubushotoranyi no kwangiza ibikorwa remezo rusange mu gace ka Malioboro.

Yagize ati: “Imyigaragambyo yari yabanje yagendaga mu mahoro kandi mu buryo buteguye kuva mu gitondo, ariko mu buryo butunguranye, itsinda ry’abantu batamenyekanye ryatangiye ibikorwa by’ubushotoranyi n’imvururu, ryangiza ibikorwa remezo rusange mu gace ka Malioboro.”

Iyi mirwano yadutse nyuma y’uko indi myigaragambyo yo kwizihiza Umunsi w’Urubyiruko muri Indonesia yari yarangiye mu mahoro.

Polisi yavuze ko abari bitabiriye iyo myigaragambyo ya mbere bari bamaze gutaha saa 17:30, mbere y’uko indi mirwano yaduka hafi y’inyubako y’Inama Njyanama y’Intara.

Abapolisi bongeye kugenzura agace ka Malioboro ahagana saa yine z’ijoro, ariko imvururu zakomeje kugeza mu gitondo cyo ku wa Kane. Abigaragambya bakomeje kubatera amabuye n’ibiturika, mu gihe polisi na yo yakoresheje imyuka iryana mu maso kugira ngo ibatatanye.

Imyigaragambyo ya mbere yari yahuje abanyeshuri n’imiryango itari iya Leta, basaba ko politiki za Leta zivugururwa, uburenganzira bw’abakozi bukarushaho kubahirizwa, ndetse banamagana ibyo bavuga ko ari ibikorwa byo gukandamiza abaturage bikorwa n’inzego za polisi.

Indonesia yizihiza Umunsi w’Urubyiruko buri tariki ya 28 Ukwakira, mu rwego rwo kwibuka itangazo ry’amateka ryashyizweho umukono mu 1928, ubwo urubyiruko rw’abaharaniraga ubwigenge rwiyemezaga ubumwe bushingiye ku gihugu kimwe, ishyanga rimwe n’ururimi rumwe ruhuza abaturage.

Kwamamaza iyo minsi mikuru byari bigamije kwibutsa uruhare rw’urubyiruko mu bumwe bw’igihugu, ariko imvururu zabaye i Yogyakarta zaje gutuma umunsi urangira mu makimbirane hagati y’abigaragambya n’inzego z’umutekano.

Like This Post?

• Share On:

Related Posts

---