• Guyana: Umwami Charles III yagiranye ibiganiro na Perezida wa Guyana, Irfaan Ali.

Umwami Charles III w’u Bwongereza yatangiye uruzinduko rw’iminsi ibiri muri Guyana ku wa Kane, aho yakiriwe mu birori byemewe na Leta, anagirana ibiganiro na Perezida w’icyo gihugu, Irfaan Ali.

Uyu mwami yageze mu murwa mukuru Georgetown, aho yakiriwe na Perezida Irfaan Ali, ndetse anitabira igikorwa ndangamuco cyateguwe mu rwego rwo kumwakira.

Biteganyijwe ko muri uru ruzinduko azanahura n’abacuruzi bakomeye ndetse n’abayobozi b’imidugudu y’Abanyamerika kavukire, bazwi muri Guyana nka Toshaos.

Perezida wa Guyana, Irfaan Ali, ni we watumiye Umwami Charles III muri iki gihugu. Icyakora, uru ruzinduko rubaye mu gihe bamwe mu bayobozi bo mu bihugu byo mu karere ka Caraïbes bakomeje gusaba u Bwongereza kwemera uruhare rwabwo mu bucakara no gutanga indishyi ku ngaruka zabwo.

Mu kiganiro aherutse kugirana na ITV News, Perezida Ali yavuze ko Umwami Charles III yemeye mu buryo bukwiye ko ubucakara bwari kimwe mu bihe by’umwijima mwinshi mu mateka y’ikiremwamuntu.

Yakomeje avuga ko intambwe ikurikiyeho ari uko u Bwongereza busaba imbabazi ku byabaye.

Yagize ati: “Mwakoze ibikorwa byo gukoresha ako karere. Mwazambije ubuzima bw’abantu. Mwateje ubukene n’iterambere ridindira.”

Ku ruhande rw’u Bwongereza, Guverinoma yakomeje kwanga gusaba imbabazi ku mugaragaro cyangwa gutanga indishyi zijyanye n’ingaruka z’ubucakara ku miryango yabukorewe no ku busumbane bukigaragara mu bakomoka kuri abo bantu.

U Bwongereza buvuga ko mu gihe ibyo bikorwa byakorwaga, ubucakara butari bwemewe nk'icyaha mu mategeko mpuzamahanga y'icyo gihe.

Umwami Charles III uri mu ruzinduko rw’akazi rw’iminsi icyenda mu bihugu byo mu karere ka Caraïbes.

Biteganyijwe ko ku wa Gatanu azagera muri Antigua-et-Barbuda, aho azitabira inama y’abakuru ba za Guverinoma z’ibihugu bigize umuryango wa Commonwealth.

Muri iyi nama azahura n’abayobozi bahagarariye ibihugu 56 bigize uyu muryango.

Ibiganiro biteganyijwe muri iyi nama bizibanda ku mihindagurikire y’ikirere, ubucuruzi n’iterambere.

Gusa, bamwe mu bayobozi bo mu bihugu bya Caraïbes batangaje ko ikibazo cyo gusaba indishyi ku ngaruka z’ubucakara gikwiye gufata umwanya munini mu biganiro by’iyi nama.

Iki kibazo gikomeje kuba kimwe mu biganiro by’ingenzi mu mubano hagati y’u Bwongereza n’ibihugu byahoze bikolonijwe na bwo, cyane cyane ku bijyanye n’amateka y’ubucakara n’ingaruka zabwo zikigaragara muri sosiyete.

Like This Post?

• Share On:

Related Posts

---