• Israël: Ishyaka rya Netanyahu ryegukanye imyanya myinshi mu matora y’abadepite ariko ribura ubwiganze

Ihuriro ry’amashyaka rishyigikiye Minisitiri w’Intebe wa Israel, Benjamin Netanyahu, ryaje ku isonga mu matora y’abadepite, ariko ntiribasha kubona imyanya ihagije yo kugira ubwiganze mu Nteko Ishinga Amategeko, nk’uko bigaragazwa n’ibyavuye mu matora bya nyuma byatangajwe ku wa Gatanu.

Ihuriro rya Netanyahu rigizwe n’amashyaka y’iburyo n’ay’ubuhezanguni ryabonye imyanya 53 kuri 120 igize Inteko Ishinga Amategeko. Ishyaka rye rya Likud ni ryo ryabonye imyanya myinshi, aho ryegukanye 27.

Ku rundi ruhande, ihuriro ry’amashyaka atavuga rumwe na Leta, riyobowe na Gadi Eisenkot, ryabonye imyanya 48.

Ibyavuye mu matora byatangajwe na Komisiyo Nkuru y’Amatora byanagaragaje imbaraga z’amashyaka ahagarariye Abarabu, arimo Raam na Liste Commune, yabonye imyanya 19 yose hamwe. Aya mashyaka ashobora kugira uruhare rukomeye mu biganiro byo gushyiraho Guverinoma nshya.

Nta ruhande na rumwe rwabashije kubona imyanya 61 ikenewe kugira ngo rigire ubwiganze mu Nteko Ishinga Amategeko. Ibi birerekana ko ibiganiro byo guhuza amashyaka no gushyiraho ihuriro rishobora kumara igihe. Mu gihe impande zitabashije kumvikana, Israel ishobora kongera gutegura andi matora.

Itangazwa ry’ibyavuye mu matora bya nyuma ryabaye mu gihe muri Israel hakomeje kumvikana impaka, nyuma y’uko ku wa Kane ihuriro rya Netanyahu rigaragaje ibirego bitarashyigikirwa n’ibimenyetso bivuga ko amatsinda y’Abarabu bo muri Israel yaba yarahawe amafaranga aturutse mu mahanga kugira ngo agire uruhare mu guhindura ibyavuye mu matora.

Amashyaka abiri ahagarariye Abarabu ndetse na Qatar byahakanye ibyo birego.

Urwego rw’umutekano w’imbere muri Israel, Shin Bet, rwatangaje ko rwatangiye iperereza ku makosa ashobora kuba yarabaye mu matora.

Icyakora, rwashimangiye ko iryo perereza ritagamije gutesha agaciro amatora cyangwa gushinja abaturage bose bo mu itsinda runaka bitabiriye amatora mu buryo bwemewe n’amategeko.

Ku rundi ruhande, Komisiyo y’Amatora yagerageje guhosha impaka. Umuyobozi wayo w’agateganyo, Dean Livne, yavuze ko ibirego bivuga ko habaye amakosa akomeye kandi akwirakwiriye mu matora bidafite ishingiro na mba.

Impaka zikomeye zibanze ku makuru avuga ko ishyaka rya Raam rishobora kuba ryarahawe amafaranga na Qatar, igihugu gikize cyo mu karere k’Ikigobe gifitanye imiyoboro y’itumanaho na Hamas, kugira ngo ayo mafaranga akoreshwe mu kugura amajwi y’abatora.

Ku wa Kane, ishyaka rya Likud rya Netanyahu ryatangaje riti: “Scandale ya Raamgate ni umutingito muri politiki. Amatora ya Israel yaribwe!”

Umuyobozi wa Raam, Mansour Abbas, yahakanye yivuye inyuma ko ishyaka rye ryakoze ibinyuranyije n’amategeko, anavuga ko ashyigikiye ko hakorwa iperereza kugira ngo ukuri kumenyekane.

Ishyaka rya Liste Commune ryo ryashinjije Netanyahu n’abo bafatanyije politiki gukora ibyo ryise ubukangurambaga bushishikariza abantu kwangana, rivuga ko biterwa n’impungenge bafite ku kuba Abarabu barimo kugira ijambo rikomeye muri politiki ya Israel.

Kugeza ubu, nta bimenyetso byashyizwe ahagaragara n’abayobozi ba Leta bishimangira ibyo birego.

Mu mashyaka atavuga rumwe na Leta, bamwe mu bayobozi bashinje Netanyahu gushaka gutuma abaturage batongera kugirira icyizere ibyavuye mu matora, nyuma yo kunanirwa kubona ubwiganze mu Nteko Ishinga Amategeko.

Yair Golan, umukandida wo mu mashyaka y’ibumoso, yagize ati: “Arimo kugerageza kwamagana ibyavuye mu matora.”

Gadi Eisenkot yavuze ko yamenyeshejwe iby’iki kibazo n’inzego za Shin Bet na Komisiyo y’Amatora, ariko ashimangira ko hakiri kare kumenya neza ibyabaye cyangwa niba koko hari amakosa yakozwe.

Yongeyeho ko bimaze kugaragara ko Likud na Netanyahu batangiye ubukangurambaga buhuriweho bugamije gutuma abantu batemera ibyavuye mu matora.

Benjamin Netanyahu na we asanzwe ahura n’ibirego bimuhuza na Qatar. Mu mwaka ushize, abantu babiri bakoranaga na we batawe muri yombi bakekwaho kwakira amafaranga aturutse muri icyo gihugu cyo mu karere k’Ikigobe.

Qatar yamaganye ibirego biheruka kuyishinja, ibyita ibihimbano kandi bishobora guteza akaga.

Netanyahu niwe minisitiri w’Intebe umaze igihe kirekire ayobora Israel kurusha abandi mu mateka y’iki gihugu.

Mu gihe cyashize, Netanyahu ntiyigeze arwanya ku mugaragaro inkunga y’amafaranga Qatar yatangaga muri Gaza, aho yari igamije gufasha mu kubungabunga ituze muri ako karere.

Icyakora, iyo politiki yongeye gukemangwa cyane nyuma y’ibitero Hamas yagabye muri Israel ku wa 7 Ukwakira 2023.

Like This Post?

• Share On:

Related Posts

---