Yanditswe na: NSANZABERA Jean Paul
03/11/2026 21:59
Perezida wa Repubulika y’u Rwanda, Paul Kagame, yifatanyije n’abandi bayobozi bakuru b’ibihugu na za Guverinoma bigize Umuryango w’Ibihugu bikoresha Icyongereza (Commonwealth), mu muhango wo gutangiza ku mugaragaro inama ya 28 y’uyu muryango, izwi nka CHOGM 2026.
Uyu muhango wabereye mu gitondo cyo ku wa 3 Ugushyingo 2026, mu nyubako yitwa National Performing Arts Centre i St. John’s, muri Antigua na Barbuda.
Perezida Kagame yari kumwe na Minisitiri w’Intebe wa Antigua na Barbuda, Gaston Browne, wakiriye iyi nama, ndetse n’Umwami w’u Bwongereza, Charles III, hamwe n’abandi bakuru b’ibihugu na za Guverinoma n’abanyacyubahiro baturutse mu bihugu bitandukanye.
Uyu muhango ni wo watangije ku mugaragaro ibikorwa by’inama ya CHOGM 2026, ihuriza hamwe abayobozi bo mu bihugu bigize Commonwealth kugira ngo baganire ku bibazo bihuriweho, imikoranire n’icyerekezo cy’uyu muryango.
CHOGM ni inama ihuza Abakuru b’Ibihugu na za Guverinoma bo mu Muryango wa Commonwealth, ikaba iba buri myaka ibiri, ikabaha umwanya wo kuganira ku bibazo bireba ibihugu byabo n’isi muri rusange.
Muri iyi nama, abayobozi bagira amahirwe yo kungurana ibitekerezo ku bufatanye mu bukungu, uburezi, ikoranabuhanga, iterambere rirambye, imiyoborere n’ibindi bibazo mpuzamahanga.
Kwitabira iyi nama kandi bitanga amahirwe yo gushimangira umubano hagati y’ibihugu no kurebera hamwe uburyo byakongera gukorana mu nzego zitandukanye.
U Rwanda ni kimwe mu bihugu bigize Commonwealth kuva mu mwaka wa 2009, rukaba rukomeje kwitabira ibikorwa n’inama z’uyu muryango.
Perezida Kagame yitabiriye CHOGM 2026 mu gihe abayobozi b’ibihugu bigize uyu muryango bahuriye muri Antigua na Barbuda, bagamije kuganira ku bibazo bihuriweho no gushimangira ubufatanye mpuzamahanga.
Inama ya CHOGM 2026 iri kubera muri Antigua na Barbuda, ikaba ihurije hamwe abayobozi bakuru b’ibihugu, za Guverinoma n’abandi banyacyubahiro baturutse hirya no hino ku isi.
