• Bill Ruzima yaciye amarenga yo kwiyegurira Imana nyuma yo kuva muri Rehab

Umuhanzi Bill Ruzima, umaze igihe gito avuye mu kigo ngororamuco yari yarajyanywemo kubera ikibazo cyo gukoresha ibiyobyabwenge, yagaragaye mu gitaramo cya New Melody Choir aririmba indirimbo zigaruka ku byaha, agakiza n’urukundo rwa Yesu Kristo.

Ni mu gitaramo ‘Selah Concert III’ cyabereye muri Camp Kigali ku Cyumweru, tariki ya 8 Ugushyingo 2026, aho uyu muhanzi, usanzwe azwi mu njyana ya Afro-soul, yataramiye abakunzi b’indirimbo zo kuramya no guhimbaza Imana.

Bill Ruzima, utari mu bahanzi bari batangajwe mbere ko bazaririmba muri iki gitaramo, yagiye ku rubyiniro yambaye ikote ry’ubururu bwerurutse, aririmbana n’abandi baririmbyi bari bamuhagaze inyuma.

Mu ndirimbo yaririmbye, yagarutse ku buryo iby’isi n’ibyaha bishobora kureshya umuntu, nyamara bikamusigira ingaruka mbi.

Yagize ati: “Mbega ngo iby’isi biraryoha biryana, mbega ngo ibyaha biraryoha biryana.”

Muri iyo ndirimbo, yakomeje agaruka ku kubura amahoro no ku rukundo rwa Yesu Kristo, aririmba amagambo yumvikanisha ko umuntu ashobora guhinduka akava mu buzima bwamuganisha mu nzira mbi.

Hari n’aho yakoresheje izina rye mu magambo ashobora kumvikana nk’agereranya ubuzima bwo hambere n’ubuzima bushya, ati: “Nari urupfu, nari ntaraba Ruzima.”

Aya magambo yumvikanye mu gihe uyu muhanzi yari amaze hafi umwaka ajyanywe mu kigo ngororamuco kubera ikibazo cy’ibiyobyabwenge.

Uko yaririmbye muri iki gitaramo byabaye nk’ibica amarenga yo kwiyegurira Imana, cyane ko hari aho yitsaga akavuga amagambo akomeye yo kuva mu byaha no gukizwa. Icyakora, muri iki gitaramo ntiyigeze atanga ubuhamya busobanura niba ibyo yaririmbaga byari bifitanye isano n’ubuzima bwe bwite.

Bill Ruzima yanaririmbye indirimbo irimo amagambo agira ati: “Mbese ni he twabonera amahoro menshi?”, agaruka ku mahoro umuntu abonera muri Yesu Kristo.

Mu mashusho yafashwe muri iki gitaramo, abacyitabiriye bagaragara bahagaze, bamwe bazamuye amaboko, abandi baririmbana na we.

Kugaragara kwe muri iki gitaramo byibukije ibihe bikomeye yanyuzemo mu mwaka ushize, ubwo yatabwaga muri yombi n’Urwego rw’Igihugu rw’Ubugenzacyaha (RIB), akurikiranyweho gukoresha no gutwara urumogi.

Bill Ruzima yatawe muri yombi ku wa 15 Ugushyingo 2025, nyuma aza koherezwa mu kigo ngororamuco cya Huye ku wa 19 Ugushyingo uwo mwaka, kugira ngo ahabwe ubufasha bwo guhangana n’ikibazo cyo gukoresha ibiyobyabwenge.

Nyuma yo kuva muri icyo kigo, uyu muhanzi yagiye agaruka ku bibazo yanyuzemo. Yakunze kugaruka ku kibazo cy’agahinda gakabije n’uburyo gashobora gutuma bamwe mu rubyiruko bishora mu biyobyabwenge.

Bill Ruzima, wamenyekanye mu ndirimbo zirimo ‘Imana y’Abakundana’, ‘Imbobo’ na ‘Mitima Yatanye’, ni umwe mu bahanzi bakunzwe cyane mu njyana ya Afro-soul.

Igitaramo ‘Selah Concert III’ yagaragayemo cyateguwe na New Melody Choir, cyitabirwa n’abandi bahanzi barimo Papi Clever na Dorcas, True Promises ndetse na Sam Rwibasira.

Cyari igitaramo cya mbere New Melody Choir yongeye gutegura muri uru ruhererekane nyuma y’imyaka umunani, kuko ‘Selah Concert II’ yari yabaye mu 2018.

 

 

 

Like This Post?

• Share On:

Related Posts

---