• Senegali: Abantu 39 bapfiriye mu bwato bwarohamye bugiye kubajyana muri Espagne

Ikindi cyago cy’abimukira cyashenguye imitima ya benshi muri Sénégal, nyuma y’uko nibura abantu 39 bahitanywe n’ubwato bwarohamye mu Nyanja ya Atlantika, hafi y’Intara ya Louga, mu majyaruguru ashyira uburengerazuba bw’iki gihugu.

Nk’uko inzego z’ubuyobozi zibitangaza, ubwo bwato bwari butwaye aba bimukira bwari bugamije kugera mu Birwa bya Canary, muri Espagne, bukoresheje inzira yo mu Nyanja ya Atlantika izwiho kuba ishobora guteza impanuka zikomeye.

Iyi mpanuka yabereye hafi y’umudugudu wa Thieppe, aho ubwato bwaje gusangwa ku nkombe z’inyanja bwamenaguritsemo ibice bibiri. Bivugwa ko benshi mu bahitanywe n’iyi mpanuka bakomokaga muri ako karere, by’umwihariko mu midugudu ya Thieppe na Potou.

Abatabazi bashoboye kubona imirambo y’abantu batandukanye, harimo n’iyari imaze igihe mu mazi ku buryo yari yaratangiye kubora cyane.

Nyuma y’aya makuru y’incamugongo, Minisitiri w’Umutekano w’Imbere mu gihugu muri Sénégal, Mouhamadou Makhtar Cissé, yamaganye bikomeye ibikorwa by’imitwe icuruza abantu ibambutsa mu buryo butemewe n’amategeko, ayigereranya n’abacuruzi b’abacakara bo mu bihe bya none.

Uyu muyobozi yagize ati: “Kugenda ni amahitamo ya buri muntu, ariko gupfira mu nyanja ntibigomba kuba amahitamo.”

Yasabye ko abategura ingendo zitemewe zambutsa abimukira bakurikiranwa n’amategeko, kugira ngo bahagarike ibikorwa byabo bishyira ubuzima bw’abantu mu kaga.

Leta ya Sénégal yatangaje kandi ko ishaka kongera ubufatanye n’ibindi bihugu byo mu karere kugira ngo hafatwe ingamba zihuriweho zo guhangana n’ikibazo cy’abimukira bahaguruka mu buryo bunyuranyije n’amategeko. Dakar igaragaza ko inzira zikoreshwa n’abimukira zigenda zihinduka, bamwe bakaba batangiye kunyura mu bindi bihugu bituranye na Sénégal.

Nubwo hakomeje gukorwa ubukangurambaga bugamije kumvikanisha ingaruka z’ingendo zambuka inyanja, ndetse n’akaga zishobora guteza, abantu benshi baracyagerageza kugera ku mugabane w’u Burayi banyuze mu Nyanja ya Atlantika.

Kuva mu ntangiriro z’ukwezi k’Ugushyingo, abimukira barenga 3.300 bari bamaze kugera ku kirwa cya El Hierro, kiri mu birwa bya Canary muri Espagne. Umubare munini w’abo bimukira watumye inzego z’ibanze zitangaza ko icyo kirwa kiri mu bihe byihutirwa, bitewe n’izamuka ry’abimukira bakigeraho.

Ibi byongeye kugaragaza uburemere bw’ikibazo cy’abaturage bakomeza gushyira ubuzima bwabo mu kaga bashaka kugera i Burayi, akenshi bakagwa mu maboko y’ababizeza kubambutsa, nyamara bakabashyira mu ngendo zishobora kubahitana.

 

Like This Post?

• Share On:

Related Posts

---