Yanditswe na: NSANZABERA Jean Paul
14/11/2026 09:30
Ikipe
y’igihugu y’u Rwanda, Amavubi, yatsinzwe na Mali ibitego 3-2 kuri Stade du 26
Mars i Bamako, mu mukino w’umunsi wa gatatu w’itsinda K mu gushaka itike
y’Igikombe cya Afurika (CAN 2027). Umukino watangiye saa tatu z’ijoro ku isaha
y’i Kigali.
Mbere y’uko
aya makipe ahura, yari afite amanota atandatu anganya, buri imwe yaratsinze
imikino ibiri ibanza. Ibyo byatumaga uyu mukino ugira akamaro gakomeye ku
makipe yombi mu rugamba rwo gushaka itike ya CAN 2027.
Amavubi ni
yo yafunguye amazamu ahagana ku munota wa 28, ubwo Kwizera Jojea yatsindaga
igitego cyashyize u Rwanda imbere n’igitego 1-0.
Icyakora,
Mali yishyuye mbere y’uko igice cya mbere kirangira. Kamory Doumbia yatsinze
igitego cyo kwishyura mbere y’uko amakipe ajya kuruhuka, bituma igice cya mbere
kirangira anganya igitego 1-1.
Mu
ntangiriro z’igice cya kabiri, Kavita Phanuel yongeye gushyira Amavubi imbere,
atsinda igitego cya kabiri cy’u Rwanda. Icyo gihe, Amavubi yari ayoboye umukino
ku bitego 2-1.
Ku munota wa
62, Moussa Yeo yatsindiye Mali igitego cyo kwishyura, mu mukino we wa mbere
yari yabanje mu kibuga. Icyo gitego cyatumye amakipe yombi yongera kunganya
ibitego 2-2.
Ku munota wa
84, Mamadou Camara yatsinze n’umutwe igitego cya gatatu cya Mali, ari na cyo
cyayihesheje intsinzi y’ibitego 3-2. Cyari igitego cye cya mbere mu ikipe
y’igihugu ya Mali.
Umutoza
w’Amavubi, Stephen Constantine, yari yabanje mu kibuga abakinnyi barimo
umunyezamu Ntwari Fiacre, Byiringiro Gilbert, Niyomugabo Claude, Kavita
Phanuel, Mutsinzi Ange na Nganji Darryl. Abandi ni Bizimana Djihad wari
kapiteni, Iradukunda Elie Tatou, Mickels Joy Lance, Mickels Leroy Jacques na
Kwizera Jojea.
Iyi ntsinzi
yatumye Mali igira amanota icyenda, nyuma yo gutsinda imikino yayo itatu yose.
Amavubi yo yasigaranye amanota atandatu nyuma yo gukina imikino itatu muri iri
tsinda.
Mu gushaka
itike y’Igikombe cya Afurika cya 2027 kizabera muri Kenya, Tanzania na Uganda,
amakipe abiri ya mbere muri iri tsinda ni yo azabona itike.
Amavubi na
Mali azongera guhura ku wa Kabiri, tariki ya 17 Ugushyingo 2026, kuri Stade
Amahoro i Kigali, mu mukino uzatangira saa tatu z’ijoro (21:00).
