• Amakuru / POLITIKI


Abaturage bo mu idini rya Orthodox rikomeye rizwi nka Ultra-Orthodox muri Israel bigaragambije ku wa Kane, bafunga imihanda minini ndetse bahangana n’inzego z’umutekano, bamagana itegeko ribasaba kujya mu gisirikare no gufungwa kw’abanyeshuri biga iby’idini.

Amashusho yakwirakwijwe agaragaza abigaragambya bahagaritse imodoka mu muhanda munini, polisi ibakuraho ku ngufu, mu gihe hifashishijwe abapolisi bari ku mafarashi n’ibikoresho biturika bitangiza bikomeye mu gutatanya imbaga.

Umwe mu bigaragambyaga yumvikanye avuga ko Leta yatangaje intambara kuri Torah, igitabo cyera mu idini rya Kiyahudi, ashimangira ko abayoboke ba Haredi Judaism bagomba kuyirwanya.

Iyi myigaragambyo yatangiye nyuma y’uko mu ntangiriro z’iki cyumweru hafashwe umugabo wo muri iri dini ku kibuga cy’indege cya Ben Gurion, nyuma y’uko inzego zibishinzwe zimenye ko atigeze yitaba igisirikare nk’uko yari abisabwa.

Ifatwa rye ryakurikiwe n’imyigaragambyo mu duce twa Petah Tikva, Bnei Brak, Yeruzalemu na Beit Shemesh.

Aya makimbirane yongeye kugaragaza kutumvikana kumaze igihe hagati ya Leta ya Israel n’abayoboke ba Ultra-Orthodox ku bijyanye no kujya mu gisirikare.

Mu 2024, Urukiko rw’Ikirenga rwa Israel rwemeje ko abagabo bo muri iri dini batagomba gukomeza guhabwa ubusonerwe rusange ku bijyanye n’igisirikare, ahubwo ko bagomba gutangira kwinjizwa mu gisirikare.

Nyuma y’igihe, polisi yatangaje ko yatatanyije abigaragambyaga ndetse n’imihanda yari yafunzwe ikongera gufungurwa.

Like This Post? Related Posts
Andika igitekerezo
Recent Comments