05:43:30
BPlus Tv
Super Fresh
Rwanda Form
KeySoft
Matelas Dodoma
Dr Frank Habineza yijeje abaturage ubuvugizi bwisumbuye ku misoro y’ubutaka
Yanditswe na: DUSHIMIMANA Elias
2024-07-03 07:54:27 Amakuru
Kuri uyu wa Kabiri, tariki 02 Nyakanga 2024, Nibwo ibikorwa byo kwamamaza Dr Frank Habineza ku mwanya wa Perezida wa Repubulika byakomereje mu Turere twa Nyabihu na Rubavu, aho abaturage bakurikiye imigabo n’imigambi by’Ishyaka riharanira demukarasi no kurengera ibidukikije.
Iri shyaka ririzeza abaturage ubuvugizi bwisumbuye ku misoro y’ubutaka.
Ku Mukamira mu Karere ka Nyabihu ni ho Ishyaka Democratic Green Party of Rwanda ryatangirije ibikorwa byo kwamamaza abakandida baryo barimo Dr Frank Habineza uhatanira kuba Perezida wa Repubulika n’abandi 50 babarizwa muri iri shyaka bashaka kujya mu Nteko Ishinga Amategeko.
Bamwe mu baganiriye na RBA bavuga ko kwitabira ibi bikorwa bituruka ku kuba baramaze gusobanukirwa n’amahame ya demukarasi, bakaba baha agaciro ibitekerezo bitandukanye ariko byuzuzanya.
Dr Frank Habineza avuga ko ibyo ishyaka ayoboye ryakoreye ubuvugizi mu myaka bamaze mu Nteko Ishinga Amatekego byakemutse ku kigereranyo cya 70%.
Mu karere ka Rubavu Dr Frank Habineza yiyamamarije kuri centre ya Mahoko mu murenge wa Kanama, akaba yabwiye abaturage ko nibamutora nka Perezida wa Repubulika bakanazamura umubare w’imyanya ya Green Party mu Nteko Ishinga Amategeko, iri shyaka rizakora ubundi buvugizi cyane ku misoro y’ubutaka.
Mu rwego rw’ubukungu, Ishyaka Democratic Green Party of Rwanda ririzeza abaturage ko rizaharanira kugabanya inyungu ku nguzanyo baka muri banki kuko ahanini usanga zitajyane n’ijanisha bunguka mu mishinga bashoye.
Kuri gahunda y’Ishyaka Green Party kwamamaza abakandida baryo birakomeza kuri uyu wa Gatatu mu Turere twa Rutsiro na Karongi, aho iri shyaka rizageza ku baturage imigabo n’imigambi irimo kunoza ubutabera, no gushyigikira inzego z’uburezi n’ubuzima.
Aha iri shyaka rirashaka ko Umunyarwanda azajya agura imiti yose yishingiwe n’ubwisungane mu kwivuza.
