Abakobwa bambariye ku mufunzo ! Agahinda k'abakinnyi ba Rayon Sports bazahajwe n'inzara kubera kudahembwa

Abakinnyi ba Rayon Sports WFC bambariye ku mufunzo , kuko nubwo barimo gutsinda imvura y'ibitego, ariko inzara iravuza ubuhuha , kuri  ubu bakaba bamaze amezi 3 badahembwa, ndetse barishyuza uduhimbazamusyi two mu mwaka ushize .

Abakinnyi b'ikipe ya Rayon Sports WFC bari mu gahinda ko kubona abafana bishimira ko batsinze , nyamara bo bagashengurwa no kuba bamaze igihe batikora ku munwa, kuko bamaze amezi 3 batazi uko umushahara usa, Rayon Sports WFC  irimo kwitwara neza muri shampiyona, kuko imaze gutsinda imikino yose 3 bamaze gukina .

Amakuru btnrwanda yamenye ni uko abakinnyi ba Rayon Sports WFC, uretse kuba bamaze amezi 3 badahembwa , iyi kipe inababereyemo ibirarane by'uduhimbazamusyi 10 two mu mwaka  ushize , nyamara aba bakobwa bari bitwaye neza, batwara ibikombe byose bahataniye.

Abakinnyi ba Rayon Sports baherutse bishimira igikombe bategereza uduhimbazamusyi barahemba 

Nyuma yo kurambirwa no guhangana nibi bibazo , bamwe mu bakinnyi ba Rayon Sports WFC batangiye gusesa amasezerano, amakuru twamenye ni uko Captain wiyi kipe Kalimba Alice ariwe wabimburiye abandi, agasaba ko yasesa amasezerano, gusa ntiyavuze impamvu ashaka kuyasesa kuko yababwiye impamvu ze bwite , mu kugerageza kubaza Kalimba Alice, ntabwo yifuje kugira icyo avuga kuri aya makuru .

Amakuru dukesha zimwe mu nshuti za hafi za Alice , ni uko impamvu yatumye asesa amasezerano, ari uko yari  arambiwe gukora adahembwa, ndetse akabona ubuyobozi bwiyi kipe butabitayeho , amakuru avuga ko uyu mukobwa wari usanzwe ari mubo iyi kipe igenderaho ashobora no guhagarika ibyo gukina umupira w'amaguru kubera ibibazo biri mu mupira w'abagore.

Kalimba Alice wari captain wa Rayon Sports yamaze gusesa amasezerano kubera kudahemberwa igihe 

Ubwo Rayon Sports WFC yashingwaga mu myaka 2 ishize , hari amakuru yavuzwe ko iyi kipe yaba ihembwa na Skol , amakuru twamenye ubwo twacukumburaga ibyiyi nkuru ni uko Skol yifuje kujya yihembera iyi kipe, ariko Rayon Sports irabyanga , ndetse abakinnyi bakababazwa nuko uduhimbazamusyi bemererwa nuru rugamba , biba ingorabahizi kuduhabwa,nyamara uruganda ruba rwamaze gushyira amafaranga kuri conte ya Rayon Sports, ariko abayobozi biyi kipe bakagorana kuyatanga.

Ikipe ya Rayon Sports muri rusange ifite ibibazo by'amikoro, kuko uretse abagore ikipe y'abagabo nayo ntabwo ishyamba ari ryeru, ariko bo nibura babona amafaranga yo gutsinda imikino ( prime ) , nyuma yo kwegura kwa Uwayezu Jean Fidel benshi bategereje umuntu uzemera kuyobora iyi kipe, kuko azagwa mu muriro w'amadeni arenga million 400 .

Rayon Sports WFC yatwaye ibikombe hafi ya  byose yakiniye umwaka ushize w'imikino 

Umupira w'amaguru mugice cy'Abagore , usa naho utitaweho , haba mu ishyirahamwe ry'umupira w'amaguru mu Rwanda , haba mu makipe , yewe no mu itangazamakuru, ibi byose bituma usanga abakinnyi aribo babihomberamo , kuko usanga umukinnyi afatwa nabi cyane , ndetse imibereho yabo ikaba iteye isoni , nyamara impuzamashyirahamwe y'umupira w'amaguru ku isi (FIFA)  itanga amafaranga yo kwita kuri iki gice , gusa ntawumenya aho arengera.

Rayon Sports WFC nyuma yo gushingwa ku bufatanye na Skol benshi bari baziko ibayeho neza kandi abakinnyi bambariye ku mufunzo