02:47:20
BPlus Tv
Super Fresh
Rwanda Form
KeySoft
Matelas Dodoma
Burundi: Minisitiri w'Intebe yashyizwe mu kiruhuko cy'izabukuru na Perezida Ndayishimiye
Yanditswe na: DUSHIMIMANA Elias
2025-05-20 11:20:30 Amakuru
Ku wa Mbere tariki ya 19 Gicurasi 2025, Nibwo Perezida w'igihugu cy'u Burundi, Evariste Ndayishimiye, yasohoye iteka rishyira mu kiruhuko cy’izabukuru Minisitiri w’Intebe, Lieutenant Général de Police Gervais Ndirakobuca, muri Polisi y’igihugu.
Itangazo ryashyizwe ahagaragara na Perezidansi y'Igihugu cy'u Burundi(Présidence de la République du Burundi) rigaragaza ko iki cyemezo gisezerera Ndirakobuca muri Polisi y’u Burundi cyashyizweho umukono na Perezida Ndayishimiye usanzwe ari Umuyobozi w’Ikirenga w’inzego z’umutekano w’iki gihugu, tariki ya 9 Gicurasi 2025.
Hasezerewe kandi Gen Maj de Police Générose Ngendanganya uyoboye Komisiyo ishinzwe kurwanya ikwirakwizwa ry’intwaro ntoya n’inini, ikorera muri Minisiteri y’Umutekano w’Imbere mu gihugu.
Ndirakobuca w’imyaka 55 y’amavuko ni umwe mu babaye abayobozi b’umutwe witwaje intwaro wa FDD warwanye intambara yari ihanganishije amoko kuva mu 1993 kugeza mu 2005.
Ndirakobuca yabaye umujyanama mu biro by’Umukuru w’Igihugu ushinzwe ibikorwa bya Polisi, ndetse ni umwe mu bavugwaho uruhare rukomeye mu kurwanya abigaragambyaga, barwanya manda ya gatatu ya Nkurunziza mu 2015.
Yabayeho umuyobozi wungirije w’urwego rw’iperereza (SNR), aba umuyobozi warwo, aba muri Komisiyo ishinzwe kurwanya ikwirakwira ry’intwaro mu gihugu, aba n’Umuyobozi wungirije wa Polisi y’u Burundi.
Kuva muri Kamena 2020 kugeza muri Nzeri 2022, Ndirakobuca yabaye Minisitiri w’Umutekano w’Imbere mu gihugu, ahava aba Minisitiri w’Intebe kugeza magingo aya.
