Yanditswe na: NSENGIYUMVA J Damascene
17/12/2025 11:59
Polisi y’u Rwanda yavuze ko Abapolisi bagaragaye mu mashusho yasakajwe ku mbuga nkoranyambaga bakurubana umunyonzi wo mu Karere ka Rubavu, wari utwaye yanyoye ibisindisha bamwinjiza mu modoka yabo, (Pandagari) ibyo bakoze bidakwiye kandi bagomba kubihanirwa.
Polisi y’u Rwanda yatangaje ibyo mu
butumwa yanyujije ku rubuga rwa ‘X’ kuri uyu wa 17 Ukuboza 2025, nyuma yuko
uwiyise ‘Beauty of Africa’, kuri urwo rubuga agaragaje amashusho y’Abapolisi
bakurura umuntu abandi bamusunika bamwinjiza mu modoka yabo.
Beauty of Africa yashyizeho ayo mashusho
ubwo yasubizaga ubutumwa Polisi bwibutsaga abantu ko gutwara ukagerayo amahoro
ari amahitamo.
Yifashishije ayo mashusho Beauty of
Africa yagize ati: “Hanyuma ibi na byo ni ibiki?”
Mu kumusubiza, Polisi y’u Rwanda yagize
iti: “Ibi byabereye mu Karere ka Rubavu taliki 16 Ukuboza 2025 aho umunyonzi
yitwaraga nabi mu muhanda biturutse kuba yanyoye ibisindisha. Uburyo yafashwe
ntibukwiye kandi aba bapolisi babikoze barimo gukurikiranwa.”
Ibyatangajwe na Polisi hari bamwe batabyakiriye
neza bagaragaza ko abo Bapolisi nta kosa bafite kuko bageragezaga gutabara
ubuzima bw’uwasinze ariko ashaka kubarwanya bitewe n’ibisindisha yari yanyoye.
Uwiyise Uwayo250 yagize ati: “Aba
bapolisi njye ndumva ari abo gushimirwa kuko umuntu wasinze gutya ntabwo
wamutwara ngo bikunde, bamurinze ibyago. RNP ndabashimiye”
Ghama Danny na we ati: “Aba bapolisi
ahubwo bashyizemo imiyaga abasivili basigaye babasuzugura bagakabya.”
Polisi y’u Rwanda yibutsa kenshi abatwara ibinyabiziga kwirinda gutwara banyoye ibisindisha kuko bishyira ubuzima bwabo n’ubwa abo batwaye mu kaga, ndetse bikaba byaganisha ku mpanuka zitera urupfu.
Like This Post? Related Posts
