• Tchad : Abantu 6 baguye mu mirwano hagati y’ingabo za Leta n’umutwe wa MPRD

Byibuze abantu batandatu bishwe mu majyepfo ya Tchad mu mirwano yahuje ingabo za Leta n’umutwe witwaje intwaro wa MPRD, nk’uko byemejwe n’impande zombi.

Iyo mirwano yadutse ku wa Kabiri mu gitondo mu gace ka Korbol, kari mu ntara ya Moyen-Chari. Ku ruhande rw’ingabo za Leta, abantu batatu bishwe naho icumi barakomereka. Ku ruhande rwa MPRD, umuyobozi w’uwo mutwe Luc Beyam Bebha yavuze ko hapfuye abarwanyi batatu yise “intwari (martyrs)”, naho babiri barakomereka.

Nk’uko byatangajwe n’inzobere mu by’umutekano, iyo mirwano yatangiye igihe igice cy’ingabo za Leta cyageragezaga kwegera ibirindiro bya MPRD, kigahita gifatirwa mu gico. Ibi byabereye mu gihe igisirikare cya Tchad cyari cyongereye abasirikare muri ako gace kegereye Repubulika ya centrafrica

Umutwe wa MPRD, washinzwe mu 2003, uvuga ko ugamije guhirika ubutegetsi bwariho icyo gihe .

Tchad  imaze imyaka irenga 30 iyobowe n’umuryango wa Deby: Idriss Deby, wishwe n’abarwanyi b’inyeshyamba, yasimbuwe  n’umuhungu we General Mahamat Idriss Deby, wagizwe Perezida w’inzibacyuho mu 2021, mbere yo gutorerwa kuyobora mu 2024 mu matora yakomeje kuvugwaho kuba atarabaye mu mucyo.

Iyi mirwano igaragaza ko umutekano ugikomeje kuba muke mu majyepfo ya Tchad , agace gakunzwe guhura n’ibitero by’inyeshyamba, rimwe na rimwe bigera no ku murwa mukuru N’Djamena.

 

Like This Post?

• Share On:

Related Posts

---