Yanditswe na: NSENGIYUMVA J Damascene
02/02/2026 18:55
Ikigo cy’Igihugu gishinzwe Iteganyagihe, Meteo Rwanda, cyatangaje ko mu minsi icumi ya mbere y’ukwezi kwa Gashyantare 2026 mu Rwanda hateganyijwe imvura iri hagati ya milimetero 30 na 120, ikaba iri hejuru y’impuzandengo isanzwe igwa muri iki gihe, yari hagati ya milimetero 14 na 105.
Nk’uko
byatangajwe muri raporo y’iteganyagihe yasohowe n’iki kigo, imvura iteganyijwe
izagwa mu minsi iri hagati y’itanu n’itandatu, bitewe n’akarere.
Meteo
Rwanda ivuga ko imvura izibanda cyane mu ntangiriro z’iki gice ndetse no hagati
y’itariki ya 5 n’iya 10 Gashyantare 2026 mu bice byinshi by’Igihugu.
Iyo mvura
iteganyijwe iterwa n’isangano ry’imiyaga iva mu majyepfo y’Isi igana mu karere
u Rwanda ruherereyemo, kimwe n’ubwiyongere bw’ubuhehere bw’umwuka buturuka
ahanini ku miyaga iva mu burengerazuba bw’Inyanja y’Ubuhinde igana muri aka
karere.
Meteo
Rwanda yatangaje ko imvura iri hagati ya milimetero 99 na 120 iteganyijwe mu
majyaruguru y’Akarere ka Musanze, mu burengerazuba bw’Uturere twa Muhanga na
Huye, mu Turere twa Nyamagabe na Nyaruguru (uretse ibice by’uburasirazuba),
ndetse no mu Ntara y’Iburengerazuba, uretse mu bice bito by’uburasirazuba
bw’Uturere twa Nyabihu, Karongi n’amajyepfo y’Akarere ka Ngororero.
Imvura iri
hagati ya milimetero 76 na 99 iteganyijwe mu bice bisigaye by’Intara
y’Iburengerazuba, mu majyaruguru no mu burengerazuba bw’Umujyi wa Kigali, mu
bice byinshi by’Intara y’Amajyepfo uretse Amayaga, mu Ntara y’Amajyaruguru
uretse mu burasirazuba bw’Akarere ka Gicumbi, ndetse no mu gice gito
cy’uburengerazuba bw’Akarere ka Gatsibo.
Mu gihe
imvura iri hagati ya milimetero 53 na 76 iteganyijwe mu Turere twa Bugesera,
Ngoma na Rwamagana, mu bice bisigaye by’Umujyi wa Kigali, mu bice bisigaye
by’Intara y’Amajyepfo, mu Karere ka Gicumbi no mu bice by’uburengerazuba
bw’Uturere twa Nyagatare, Gatsibo, Kayonza na Kirehe.
Ahasigaye
mu gihugu hose hateganyijwe imvura iri hagati ya milimetero 30 na 53.
Meteo
Rwanda yanaburiye ko imvura nyinshi ishobora kuzajyana n’inkuba mu Turere twa
Rutsiro, Nyamasheke, Rusizi, Nyamagabe, Nyaruguru, Huye, Burera, Gicumbi,
Rulindo na Gakenke, ndetse hakazabaho umuyaga mwinshi mu Turere twa Kayonza,
Ngoma, Nyanza, Gisagara, Musanze, Nyamagabe, Huye na Burera.
Yasabye
Abaturarwanda gufata ingamba zo kwirinda ingaruka zishobora guterwa n’inkuba
n’umuyaga mwinshi, no gukurikiza amabwiriza atangwa n’inzego zishinzwe gukumira
no guhangana n’ibiza.
Ku
bijyanye n’ubushyuhe, Meteo Rwanda yatangaje ko mu ntangiriro za Gashyantare,
ubushyuhe bwo hejuru buteganyijwe buzaba buri hagati ya dogere Selisiyusi 21 na
29, mu gihe ubushyuhe bwo hasi buzaba buri hagati ya dogere Selisiyusi 9 na 18.
Hanateganyijwe umuyaga uringaniye ushobora kugera ku mwinshi, ufite umuvuduko
uri hagati ya metero 4 na 12 ku isegonda, mu bice bitandukanye by’Igihugu.
