• John Blaq yahishuye ko nta nyungu akura mu ndirimbo ze za Kera

 Umuhanzi w’Umunya-Uganda Kasadha John, uzwi cyane ku izina rya John Blaq, yafunguye umutima agaragaza ukuri kubabaje ku bijyanye n’umuziki yasohoye mu ntangiriro z’umwuga we, avuga ko atacyungukira na gato mu ndirimbo ze za kera kubera amasezerano mabi yagiranye n’ubuyobozi bwe bwa mbere.

Mu kiganiro yagiranye na televiziyo yo mu gihugu cye, John Blaq yavuze ko abayobozi be ba mbere bafashe uburenganzira bwose ku bihangano bye (copyrights), bituma ari bo bakusanya amafaranga yose aturuka kuri izo ndirimbo kugeza n’ubu.

Yagize ati: “Sinjya mbona na make mu ndirimbo zanjye za kera. Ubuyobozi bwanjye bwa mbere ni bwo bukusanya amafaranga yose. Ni bo bahabwa inyungu zose.”

Uyu muhanzi yasobanuye ko nubwo izo ndirimbo zigifite abazikurikirana benshi kuri internet, zigakomeza kurebwa no kumvwa ku mbuga zitandukanye, we ntacyo azibonamo.

Ati: “Birababaza kubona indirimbo zawe zigifite zumvwa zikanarebwa cyane  ariko wowe ukabona nta faranga na rimwe riri kukugeraho.”

John Blaq yavuze ko muri icyo gihe yari akiri muto mu mwuga w’umuziki, adashoboye gusoma no gusobanukirwa neza amasezerano yashyirwagaho umukono, ari na byo byatumye atakaza uburenganzira ku bihangano bye bya mbere.

Yagize ati:“Icyo gihe sinari nsobanukiwe neza uko amasezerano y’umuziki akora. Nari nishimiye gusa kubona indirimbo zanjye zisohotse.”

Nubwo byose byagenze uko, John Blaq ashimangira ko atari umuntu ufite inzika cyangwa agahinda ku bayobozi be ba mbere, kuko ubu ubuzima bwe bwahindutse cyane nyuma yo kwigira no kwikorera.

Ati: “Sinabyitayeho cyane, kuko ubu ninjiza amafaranga menshi kurusha bo. Ndi mu mwanya mwiza kurusha uko nari ndi icyo gihe.”

Umuhanzi wakunzwe mu ndirimbo  Ebyos yavuze ko kwigenga no kwiyubakira izina rye bwite byamufashije cyane, haba mu bijyanye n’amafaranga ndetse no mu buhanzi bwe.

Yagize ati: “Ubu brand yanjye ikora neza. Ndigenga, mfata ibyemezo byanjye ku muziki nkora, kandi mbona inyungu zawo.”

John Blaq yongeyeho ko inyungu imwe gusa abona mu ndirimbo ze za kera ari igihe atumiwe mu bitaramo byo kuzikora imbonankubone.

Ati: “Iyo ntumiwe mu gitaramo nkakora indirimbo za kera, ni bwo mbona icyo bimpaye. Ahandi hose nta kindi.”

Ibyo yatangaje byakanguye ibiganiro bikomeye mu bahanzi bakiri bato, aho benshi batangiye kongera kwibaza ku ngaruka zo gusinya amasezerano mabi y’ubuyobozi ashobora gutuma umuhanzi atakaza uburenganzira ku bihangano bye.

John Blaq yasabye abahanzi bagitangira kutihutira gusinya amasezerano batayumvise neza, ahubwo bakabanza kugisha inama, bakitabaza abanyamategeko, ndetse bakiga ku burenganzira ku bihangano byabo.

Yagize ati: “Ni ngombwa ko umuhanzi amenya agaciro k’ibihangano bye. Amasezerano mabi ashobora kukugira umunyamuziki ukunzwe ariko ukennye.”

Iyi nkuru ya John Blaq ikomeje kuba isomo rikomeye mu nganda z’umuziki muri Afurika, by’umwihariko ku bahanzi bakiri bato, ibibutsa ko ubwenge mu masezerano bungana n’impano mu muziki.

 

Like This Post?

• Share On:

Related Posts

---